Een avokado per dag help om 'slegte' cholesterol te verlaag

Navorsers van Penn State College of Medicine in die VSA het bevind dat een avokado per dag kan help om "slegte cholesterol" te verlaag.

Volgens die navorsers kan slegte cholesterol verwys na beide geoksideerde lae-digtheid lipoproteïen (LDL) en klein, digte LDL deeltjies.

Die het het bevind dat die eet van een avokado per dag geassosieer word met laer vlakke van LDL (spesifiek klein, digte LDL-deeltjies) en geoksideerde LDL by volwassenes met oorgewig of vetsug.

Die navorsing is gepubliseer in die Journal of Nutrition.

’n Leeftyd van gereeld oefening vertraag veroudering

Indien jy gereeld aktief is bly jou liggaam jonger en gesonder.

Dit is die bevinding van navorsers aan die University of Birmingham en King's College Londen. Hulle het bevind dat gereelde oefening liggaamsvet en cholesterolvlakke onder beheer hou en dat mans se testosteroonvlakke meer stabiel is. Die immuniteitstelsel verouder ook glad nie soos die van mense wat nie oefen nie.

Verband tussen verwerkte voedsel en kanker

Daar bestaan ’n moontlike verband tussen hoogs verwerkte voedsel en kanker.

Navorsing hieroor duur voort, maar die bevindinge van ’n studie vroeër vanjaar dui daarop dat kanker al hoe meer van ’n epidemie kan word soos die inname van hoogs verwerkte voedsel toeneem.

Daar word veral vinger gewys na gaskoeldrank, graanvlokkies wat met suiker bestrooi word, kitskos en verwerkte vleisprodukte wat baie vet, sout en suiker bevat. In ontwikkelde lande kan dit tot 50% van ’n daaglikse dieet opmaak. Heelwat navorsing het al ’n verband gevind tussen hierdie voedsel en hoër risiko’s van vetsug, hoë bloeddruk en cholesterolvlakke.

Behalwe kanker oor die algemeen het die nuwe navorsing veral gekonsentreer op bors-, prostaat- en kolonkanker. Die resultate toon dat ’n 10% toename van hoogs verwerkte kosse in die dieet geassosieer word met stygings van 12% in die risiko van algehele kanker en 11% in die risiko van borskanker.

Daar is nie ’n verband gevind tussen minder verwerkte kosse (soos ingemaakte groente, kaas en varsgebakte brood) en die risiko van kanker nie, terwyl die verbruik van vars of minimaal verwerkte kosse (vrugte, groente, bone, rys, pasta, eiers, vleis , vis en melk) geassosieer is met laer risiko’s van kanker en borskanker.

Die studie is gepubliseer in The BMJ.

Omega-3 is goed vir jou hart

Navorsing wat meer as 71 000 mense betrek het toon dat omega-3 vetsure jou kanse op ’n dodelike hartaanval aansienlik verminder. Sowat 42% van mense wêreldwyd met harsiektes sterf jaarliks as gevolg van ’n hartaanval.

Selfs diegene met cholesterol-probleme se risiko op ’n hartaanval word aansienlik verminder – met 17%.

Deelnemers aan die studie het 1 g omega-3 vetsure per dag gekry. Die navorsers vermoed dat die effek van dié vetsure is selfs beter as dit van vis verkry word.

Die navorsing is twee maande gelede gepubliseer in die Journal of Clinical Lipidology.

Plant-gebaseerde vegetariese dieet geassosieer met laer cholesterol

’n Oorsig van 49 navorsingsprojekte oor diëte het bevind dat ’n plant-gebaseerde, vegetariese dieet, veral veganistiese diëte, geassosieer word met laer vlakke van cholesterol, indien dit vergelyk word met enige dieet van omnivore.

Die navorsers is van mening dat die sterk korrelasie tussen vegetariese diëte en laer cholesterolvlakke bestaan as gevolg van ’n laer liggaamsgewig van persone wat ’n plantgebaseerde dieet volg, asook ’n verminderde inname van versadigde vet en ’n verhoogde inname van plantvoedsel soos groente, vrugte, peulgewasse, neute en volgraan, wat natuurlik ryk is aan komponente soos oplosbare vesel, proteïen en plantsterole.

Die studie is gepubliseer in die joernaal Nutrition Reviews.

(foto: Steve Shapiro)

Dagga toe nie so skadelik vir volwassenes nie

Selfs na baie gereelde gebruik blyk dit dat die impak van dagga op die liggaam minimaal is vir iemand onder 40 jarige ouderdom.

Dit is die bevinding van ’n studie wat onlangs gepubliseer is in die joernaal JAMA Psychiatry. Meer as ’n duisend mense tussen die ouderdomme van 18 en 38 is betrek by die navorsing. Nie net is die plant nie so skadelik nie, dit toon klein gesondheidsvoordele soos laer cholesterol. Die enigste negatiewe effek is aanpksels en verkleuring van tande wat soms voorkom.

Dieselfde groep navorsers het voorheen navorsing gedoen oor die gebruik van die plant onder tieners. Hulle het bevind dat dit die intelligensie koëffisiënt van ’n tiener met tot 8 punte kan verminder. Dieselfde gebeur egter nie met volwassenes nie.

’n Koronêre verstopping

’n Koronêre verstopping is een van die mees algemene oorsake van ’n hartaanval.

Simptome en tekens
• ’n Skielike, beklemmende pyn in die middel van die borskas – nie te verwar met slegte spysvertering nie. Hierdie pyn versprei na die arms, keel, kakebeen of rug.
• ’n Skielike lighoofdigheid wat veroorsaak dat die persoon val of gaan sit of teen iets moet leun vir ondersteuning.
• Die vel kan bleek wees en die lippe en ander ekstremiteite kan blou word.
• Die persoon kan erg sweet.
• Die persoon kan kortasem wees.
• Daar is dalk ’n vinnige pols aanvanklik wat al swakker word en ook ongereeld kan word.
• Die persoon kan bewusteloos raak.
• Die asemhaling en hartklop kan ophou.
• Wees ook bedag op simptome en tekens van skok

Belangrike mediese tellings

• Bloedtelling: Tussen 150 tot 400
• Normale bloeddruk - 120/80
• Normale bloedsuiker - 3.3 tot 5.9 mmol/l
• Normale cholesterol: 5 mmol/L of laer

Jou bloedgroep beïnvloed dalk jou geheue

Volgens ’n studie gepubliseer in die joernaal Neurology is persone met die AB-bloedgroep meer geneig tot geheueverlies as ander.

AB is nie ’n algemene bloedgroep nie en diegene met die bloedgroep is geneig tot geheueverlies wanneer hulle oud word. Daar is egter bydraende faktore wat in ag, geneem moet word. Hieronder tel hoe bloeddruk, hoe cholesterol en diabetes.

Oorgewig middeljarige vrouens behoort te oefen

Vir andersins gesonde middeljarige vroue wat oorgewig is, kan fisiese aktiwiteit hul beste opsie wees vir die vermyding van hartsiektes.

Oorgewig middeljarige vrouens is geneig om te sukkel met hartsiektes, hoë bloeddruk, hoë cholesterol, diabetes en inflammasie.

’n Onlangse studie het bevind dat selfs ’n klein bietjie oefening help om dié groep se kanse vir die ontwikkeling van hartsiektes kan verminder.

Hoë cholesterolvlakke verbind aan onvrugbaarheid

’n Onlangse studie het bevind dat hoë cholesterolvlakke waarskynlik ’n nadelige uitwerking het op paartjies wat probeer swanger raak.

Waar beide persone in so ’n verhouding hoë cholesterolvlakke het, sukkel hulle meer as ander mense om swanger te raak. Die vrou se cholesterolvlakke speel ook andersins ’n belangrike rol in vrugbaarheid.

Cholesterol speel ’n rol in die vervaardiging van hormone.

Die studie, deur die Eunice Kennedy Shriver National Institute of Child Health and Human Development, is gepubliseer in The Journal of Clinical Endocrinology and Metabolism.

Familiale hipercholesterolemie

’n Geskatte 1 uit elke 500 mense wêreldwyd ly aan familiale hipercholesterolemie (FH), 'n oorerflike toestand wat baie hoë cholesterol tot gevolg het. Dit verband met premature hartsiektes en dood. Ten spyte van hierdie hoë voorkoms bly dit grotendeels ongediagnoseerd en onbehandeld.

FH word geïdentifiseer deur die voorkoms van die lae-digtheid lipoproteïen (LDL of "slegte cholesterol") te bepaal.

Oorerflike cholesterol gereeld nie gediagnoseer nie

Oorerflike hoë cholesterol word wêreldwyd oor die hoof gesien en dit lei tot voortydige hartsiektes. Dit is 'n groot probleem aangesien dié siekte lewensgevaarlik is vir die gesondheid. Dit terwyl die siekte maklik is om te diagnoseer en te behandel.

Oorerflike cholesterol (familiële hipercholesterolemie) is maklik om te diagnoseer. ’n Eenvoudige cholesterol-toets met ’n uitslag van cholesterol-vlakke bo 8 mmol / L in volwassenes en bo 6 mmol / L in kinders is 'n sterk aanduiding van die toestand. Die toestand kan bevestig word deur 'n genetiese toets.

Familiële hipercholesterolemie kan veroorsaak word deur mutasies (genetiese defekte) in drie proteïene, wat almal 'n rol speel in die verwydering van cholesterol-deeltjies uit die bloed deur die lewer. Hierdie mutasies beïnvloed die lewer se LDL-reseptor. Dit reseptor help om vlakke van LDL (lae - digtheid lipoproteïen) te beheer - die vet deeltjies wat die meeste van die cholesterol in die bloed vervoer.

Heterosigoties familiale hipercholesterolemie beteken dat die persoon een genetiese defek van een van sy of haar ouers geërf het.

Homosigoties familiële hipercholesterolemie beteken dat die persoon twee genetiese defekte geërf het, dit wil sê een uit elk van sy of haar ouers.

Mense met familiale hipercholesterolemie het hoë cholesterolvlakke dwarsdeur hulle lewe. Indien onbehandeld, ontstaan 'n baie hoë risiko vir hartsiektes en voortydige dood. Indien die toestand nie behandel word nie sal mans en vroue met 'n genetiese defek tipies 'n cholesterolvlak van 8-15 mmol / L hê en waarskynlik hartsiektes ontwikkel voor die ouderdom van 55 - 60 jaar. Die baie ongelukkige mense wat twee genetiese defekte geërf het sal 'n cholesterolvlak van 12-30 mmol / L hê, indien onbehandel sal hulle waarskynlik hartsiektes ontwikkel en sterf voor die ouderdom van 20.

Familiële hipercholesterolemie word hoofsaaklik behandel met statins en 'n verlaging van ’n cholesterol- dieet. As cholesterol vlakke nie voldoende verlaag nie, kan ’n cholesterol absorpsie inhibitor toegedien word. Die mense met die hoogste cholesterol vlakke, diegene wat ly aan homosigotiese familiële hipercholesterolemie, kan ook nog behandel word met LDL cholesterol aferese, 'n proses soortgelyk aan nierdialise.

Die inligting is verkry uit ’n onlangse verslag gepubliseer in die mediese joernaal European Heart Journal.

Wat is cholesterol?

Cholesterol word deur die liggaam vervaardig uit diereprodukte om jou gesondheid te handhaaf. 75% word deur jou lewer gemaak en 25% kom uit jou kos. Dit verteer vet en vervaardig vitamiene D en hormone.

Cholesterol kan nie in die bloed oplos nie, en daarom word dit na ons selle geneem deur lipoproteïene. Wanneer jy vet eet skakel jou lewer dit om in in 'n tipe lipoproteïene, laedigtheid- lipoproteïene, die sogenaamde "slegte" cholesterol (LDL). Te veel LDL in die bloed laat dit opbou in die slagare. Dit veroorsaak probleme soos aterosklerose. Indien jy geneties geneig is om baie LDL te hê , is jou kanse beter om reeds vroeg in jou lewe verstopte are te kry.

Hoëdigtheid- lipoproteïene (HDL), die sogenaamde "goeie" cholesterol, neem cholesterol uit die are na die lewer, waar dit uitgeskei word.

'n Appel 'n dag

Daar is verskeie redes om 'n appel 'n dag deel van jou dieet te maak:

- Appels is ryk aan vesel. Dié vesel help om maagdermprobleme te verminder en dit help met spysvertering.

- Appels het 'n lae glisemiese indeks (GI) wat help met die stadige vrystelling van suiker in die bloedstroom. So help dit om insulienvlakke te beheer. Appels is dus 'n belangrike vrug indien jy aan suikersieke ly.

- Die pektien in appels verlaag cholesterol.

- Appels bring 'n ontgiftigingseffek mee wat help om van swaarmetale in die liggaam ontslae te raak.

- Die kalium in appels versterk die hart.

- Appels verminder die risiko verbonde aan asma.

- Appels versterk die immuunstelsel, omdat dit vitamien A, C, bioflavonoïede en spoorelemente bevat. Dit help dus ook om kanker te beveg.

Cholesterol

Adel Wise skryf:
"Ek drink elke oggend 'n eetlepel appelasyn. Ek het hoor dit help met gewigsverlies en hoë cholestrol. My cholestrol is +-6.7. Wat is die voor- en nadele van appelasyn?"

Antwoord:

Die geneeswaarde van appelasyn ten spyte, daar is nie 'n wonderkuur vir cholesterol nie.

Gewigsverlies is belangrik om jou cholesterolvlakke af te bring. Kyk mooi na wat jy eet. Kies gesonde opsies. Olyfolie is byvoorbeeld 'n baie gesonder opsie as gewone kookolie. Vermy kitskos en gebraaide en gebakte produkte by die supermark. Verminder jou inname van rooivleis, eiergeel en drink net vetvrye melk. Koop volgraanprodukte en gebruik bruinrys in plaas van wit. Maak vars vrugte jou happies tussen maaltye. Eet baie vis wat ryk is aan omega-3 vette. Byvoorbeeld tuna, salm, makriel en haring.

Oefening is baie belangrik. Begin stadig en bou op. Stap, swem, ry fiets. Jy kan later selfs begin draf.

Indien jy rook hou op en gebruik alkohol verantwoordelik.

Bespreek cholesterolmedikasie met jou dokter, maar onthou dat dit nie die oplossing is nie, maar net 'n hulpmiddel om jou op die regte pad te help.

(foto: Felicity Tal)