Blaasinfeksie / Urienweginfeksie

Infeksies word dikwels veroorsaak deur besmetlike stowwe wat in die inwendige organe beland. Moegheid, koue en bloedarmoede kan jou weerstand teen infeksies verswak.

Raadpleeg jou dokter dadelik indien jy vermoed dat jy ´n blaasinfeksie het.

Boereraat:

Drink 'n bietjie koeksoda in gekookte water.

♦♦♦


Sien ook Kruie vir kwale: Blaasinfeksie

Vaginale infeksies

Infeksies word gewoonlik veroorsaak deur besmetlike stowwe wat via die vagina in die inwendige organe beland. Jy kan begin jeuk weens te warm of stywe klere, of weens uitdroging van te veel was met seep. Wees veral versigtig om te veel met geparfumeerde seep te was.

Vaginitis is ´n tipe infeksie wat veroorsaak word deur ´n geelgroen of rooierige afskeiding wat onaangenaam ruik. Dit gaan gewoonlik gepaard met ´n jeukirigheid en brandpyn.

Candida kan voorkom sonder om ´n infeksie te veroorsaak, maar as dit baie vermeerder kan dit ontsteking veroorsaak wat gepaard gaan met ´n witterige afskeiding.

Vee altyd van voor na agter af. Drink ook bosbessiesap. Dit maak die urine suur, wat die groei van bakterieë teenwerk. Vir Candida kan jy ´n tampon in jogurt doop en dan in die vagina plaas. Eet ook so gereeld as moontlik bioaktiewe jogurt. Vermy die oormatige inname van alkohol en eet minder suiker. Daar is verskillende swamteenmiddels beskikbaar om die infeksie te behandel. Dit behoort na sowat twee weke te werk.

Besoek dadelik jou dokter indien jy vermoed jy het Vaginitis.

Boereraat:

Belinda van Wijk: Los ongeveer 2 opgehoopte eetlepels koeksoda op in 'n warm bad water en sit 'n ruk, 20 min, daarin (bad dan soos gewoonlik). Dit help vir vaginale infeksie (jeukerigheid en branderigheid).

♦♦♦

Belinda van Wijk: Smeer voor slaaptyd redelik baie "gewone joghurt" (ongegeur) aan die seer gedeelte (sit net 'n pantyliner in jou broekie want dit mors baie), gaan slaap dan so en was dit môre oggend weer af. Herhaal totdat die toestand beter is.


Medisinale gebruike van kruie

Kruiegids

Mondsproei - voorkoms

Mondsproei is 'n soort swaminfeksie. Dit kom meestal by babas, bejaardes en persone met HIV voor en kan uitgeken word aan opgehewe roomkleurige, witterige of geel plekkies binne-in die wange en keel. Dit kan lei tot oop sere en letsels indien dit nie behandel word nie.

Die beste behandeling is swamteenmiddels.

Raadpleeg asseblief ’n dokter as jy vermoed jy het mondsproei.

(foto : Karolina Grabowska)

Bewusmaking van hemofilie

 Die bekende Suid-Afrikaanse spreker, lewensafrigter, fasiliteerder en vuurloopinstrukteur, Cobus “die Viking” Visser, wil dié maand help om die kollig op hemofilie, ’n seldsame genetiese afwyking waarin die bloed nie op ’n tipiese manier stol nie, te skyn.

Wêreld Hemofilie-dag word op 17 April herdenk en vanjaar se tema is: ‘Billike toegang vir almal: Erkenning van alle bloedsiektes’. Cobus, wat as kind met hemofilie gediagnoseer is, is ’n kampvegter vir gelyke en omvattende toegang tot sorg vir alle hemofilie-lyers en wil dié geleentheid gebruik om mense bewus te maak van die siekte en die impak daarvan op die lewens van lyers, asook hulle families en versorgers.

“Hemofilie en verwante bloedsiektes is lewenslange chroniese toestande waarvoor daar geen geneesmiddel is nie. Dit beïnvloed die liggaam se vermoë om bloed te stol, wat ’n andersins onopvallende gebeurtenis, soos om per ongeluk teen iets te stamp of die tandarts te besoek, in ’n lewensgevaarlike trauma kan omskep,” verduidelik Visser. “Omdat bloedsiektes so seldsaam is, word dit ongelukkig dikwels misgekyk.”

Daar is minder as 300 000 hemofilie-lyers wêreldwyd, met ongeveer 2 300 mense in Suid-Afrika wat met dié afwyking gediagnoseer is. Daar is egter, na verwagting, sowat 15 000 mense in die land wat ongediagnoseerd is. As ’n lid van die Suid-Afrikaanse Hemofilievereniging wil Cobus dus alle Suid-Afrikaners aanmoedig om vanjaar meer oor hemofilie en verwante bloedsiektes te leer.

Met sy geboorte was die lewensverwagting vir mense met hemofilie 11 jaar. Danksy mediese vooruitgang kan mense met dié siekte vandag ’n vol en vervulde lewe hê – met “die Viking” as ’n spreekwoordelike voorbeeld.

Cobus het in 2013 homself in die hospitaal bevind en kon nie beweeg nie. In plaas daarvan om op te gee, het hy besluit dat sy liggaam nie langer sy tronk sou wees nie. Ten spyte van sy toestand het hy ongelooflike fisiese prestasies behaal, insluitend om in 2018 Kilimanjaro met krukke aan te durf – iets wat hom amper sy lewe gekos het.

Sedertdien het hy dit sy lewensdoel gemaak om ander te help om hulle topprestasie te bereik en oor die jare met honderde individue, besigheidsleiers en mense met gestremdhede gewerk.

Buiten verskeie akademiese prestasies is Cobus ’n gesertifiseerde meester-vuurloopinstrukteur, ’n gesertifiseerde NLP-lewensafrigter, ’n uitvoerende besigheidsafrigter, en ’n ShadowMatch- en Enneagram-fasiliteerder. Hy is reeds twee keer met die Men of Valour-toekenning vereer.

Visser het besluit om sy inspirerende storie te deel in ’n splinternuwe boek, WALKING THROUGH FIRE. WHATEVER IT TAKES,’n diep persoonlike vertelling van sy lewensreis gevul met uitdagings, stryd, en die onwrikbare drang om bo sy omstandighede uit te styg. “Dit is ’n verhaal wat nie net die fisiese en emosionele pyn wat ek as gevolg van my hemofilie ervaar het, dek nie, maar ook die krag van die menslike gees om teen alle verwagtinge in te triomfeer,” sê hy.

Die meesleurende outobiografie begin met Cobus se vroeë lewe, wat oorskadu is deur sy gesondheidstryd, en kyk dan na die keerpunt in sy lewe, en dit wat gevolg het. Hy deel regdeur openhartig sy reis van selfontdekking, geloof, en die onwrikbare oortuiging dat alles moontlik is met toewyding en ’n passie om die wêreld te verander.

WALKING THROUGH FIRE. WHATEVER IT TAKES is eersdaags beskikbaar in Engels en Afrikaans en sal amptelik tydens ’n glansryke boekbekendstelling vrygestel word.

Eksemplare van hierdie lewensveranderende boek kan egter nou reeds vooraf bestel word. Plaas solank jou bestelling hier: http://bit.ly/cobusbook2024

Skisofrenie

Skisofrenie verwys eintlik na 'n groep persoonlikheidsversteurings. 75% van mense wat hieronder gebuk gaan is tussen 15 en 45 jaar oud.

Simptome sluit in dat die pasiënt kontak met die realiteit verloor, denkversteurings, waarnemings- en gemoedsversteurings en algemene psigometriese afwykings.

Dit is belangrik om op die volgende te let: 1) 'n Skisofreen besef nie dat sy / haar gedrag abnormaal is nie. 2) Meeste pasiënte ervaar een of ander delusie. Hulle het altyd een of ander idee wat sterk in kontras is met die realiteit. 3) So 'n persoon steur hom / haar glad nie aan iets soos taalreëls nie. Gewoonlik praat hulle baie, maar sê nie juis veel nie.

4) Meeste van die persone ervaar ook een of ander hallusinasie. Hulle sal byvoorbeeld stemme hoor wat nie bestaan nie. Die stemme gee ook gewoonlik een of ander opdrag. Dit gebeur minder dat hulle dinge sien wat nie regtig bestaan nie, maar dit kan ook voorkom.

5) Emosioneel openbaar hulle gewoonlik weinig emosies. Wanneer hulle egter wel emosies openbaar is dit heeltemal in stryd met dit wat ons verwag. Byvoorbeeld, wanneer 'n familielid sterf kan so 'n persoon uitbars in 'n lagbui.

6) Hierdie mense ervaar ook die uiterste verwarrings oor hul eie identiteit. 7) Dryfkrag en motivering is ook meesal afwesig. 8) Dit volg dat hierdie persone nie goed funksioneer binne normale sosiale omstandighede nie en hulle gewoon sosiaal onttrek.

Heelwat van hierdie mense kan vandag met behulp van moderne terapieë en veral antipsigosemiddels gehelp word.

(foto: Evelyn Chong)

Pitswere / Bloedvinte

Pitswere word ook bloedvinte genoem. Dit ontstaan in 'n haarfolikel en vorm 'n rooi knop. Namate die infeksie versprei raak die knop vol geel etter. Die knop is gewoonlik baie gevoelig.

Pitswere word gewoonlik veroorsaak deur die bakterie stafilokokkus. Indien daar 'n hoë konsentrasie van bakterieë is kom die pitswere in groepe voor. Indien dit versprei na 'n aangrensende haarfolikel/s praat ons van 'n karbonkel. 'n Karbonkel is 'n pitsweer met meer as een pit. Dit kan tot 5 cm groot wees.

Pitswere kom meesal voor op klam areas van die liggaam. Agter die nek, in die lieste en onder die arms is die meer algemene areas.

Persone met 'n lae weerstand teen bakteriële infeksie, diegene met swak persoonlike higiëne, die wat oorgewig is en persone wat baie sweet loop die gevaar om pitswere te ontwikkel.

Moet nooit 'n pitsweer druk nie. Dit kan die infeksie laat versprei. Was om die pitsweer met antiseptiese seep om te verhoed dat dit na ander haarfolikels versprei; of probeer dit behandel met antiseptiese salf. Die beste is om die pitsweer weer vanself te laat verdwyn of om dit deur 'n dokter te laat oopsny.

Jy kan die ongemak van 'n pitsweer verlig met 'n klam, warm lappie.


Medisinale gebruike van kruie

Kruiegids

Kruie vir kwale: Longe

Tee van die wilde salie word wêreldwyd gebruik vir die behandeling van borskwale.
Gooi ’n koppie kookwater oor ’n eetlepel wilde salie blare en laat dit trek vir 5 minute. Om dit meer drinkbaar te maak kan jy dit versoet met heuning en ’n skyfie suurlemoen byvoeg.

♦♦♦

Gooi ’n koppie kookwater oor ’n kwart koppie vars sewejaartjie-blare. Laat dit trek vir 5 minute.
Gooi deur ’n siffie en drink vir borskwale.

♦♦♦

Plaas ’n ¼ koppie klimop-blare in 1 koppie kookwater en laat trek vir 5 minute.
Gooi deur ’n siffie en geur met heuning na smaak.
Drink dit vir borskwale.

♦♦♦

Gekookte suurvye kan gebruik word vir die behandeling van longkwale.

♦♦♦

Neem 2 tot 4 kankerbossie blare en week dit 3 minute in ’n koppie kookwater. Heelwat Suid-Afrikaners gebruik dit vir borsprobleme.

Medisinale gebruike van kruie

Kruiegids