Soek op hierdie werf

Gebruik die alfabetiese gids om te soek vir mediese inligting of tradisionele boererate.

A B C D E F G H I J K L M N O P Q R S T U V W Z Medisinale gebruike van kruie Kruiegids



Showing posts with label Ore. Show all posts
Showing posts with label Ore. Show all posts

7.9.23

Vog vasgevang in die oor

Jy kan hierdie metodes probeer om ontslae te raak van vloeistof wat in die oor vasgevang is:

1. Gaap of sluk om die Eustachius-buis te help oopmaak.
2. Kougom kou of stokkielekkers suig help om sluk aan te moedig.
3. Kantel jou kop na die kant en trek liggies aan jou oorlel om te help om die vloeistof te dreineer.
4. Gebruik ’n warm kompres op die aangetaste oor.
5. Jy kan help om kongestie te verminder en dreinering te bevorder met medikasie wat jy by ’n apteek kan kry.

As die vloeistof nie weggaan of ongemak veroorsaak, is dit 'n goeie idee om ’n dokter te raadpleeg vir ’n behoorlike diagnose en behandeling.



(foto: Karolina Grabowska)

14.2.23

Oorpyn

’n Bestendige stroom helderrooi bloed uit die oor dui gewoonlik op skade aan die oortrommel.

’n Dun straaltjie strooikleurige vloeistof uit die oor is die teken van 'n gebreekte skedel. Die strooikleur word veroorsaak deur bloed wat meng met helder serebro-spinale vloeistof - behandel die besering soos vir inwendige bloeding.
Oorpyn is in die algemeen meesal die gevolg van infeksie in of naby die oor.

Middeloorontsteking kom gewoonlik by kinders voor en word veroorsaak deur kieme wat van die keel na die middeloor versprei.


Theo skryf:
"Ons het ’n tweeling (seun en dogter) van 2maande. Ek vermoed hy het oorpyn/ontsteking agv die bottelvoeding met die melk wat in sy oortjie inloop. Wat kan ek gee daarvoor?"

Antwoord:
As dit kom by babatjies moet die dokter liefs besluit oor die metode van behandeling. Ore is nie net daar vir hoor nie, maar is ook belangrike balansorgane. Talle probleme kan hier ontstaan.


Boereraat:

Vir oorpyn, sit heuning op ’n pluisie watte en steek dan in die seer oor.

♦♦♦

Vir oorpyn, meng ’n paar druppels brandewyn en 2 ml gliserien. Maak dit louwarm oor.
Gooi in die oor en sit ’n stukkie watte in. Herhaal indien nodig.

♦♦♦

Gooi warm soetolie in die oor en sit ’n pluisie in.

♦♦♦

Gooi skoon gliserien in die oor en sit ’n pluisie in.

♦♦♦

As jy ’n insek in die oor het, hou lig voor oor, die insek sal dalk uitkruip. Indien nie, gooi bietjie kookolie in die oor, die insek sal versmoor. Jy kan ’n insek ook probeer uitspoel met louwarm water.

Sien ook: Kruie vir kwale: Oorpyn

18.5.22

Kruie vir kwale: Oorpyn

Gebruik vars wildeals blare vir oorpyn, met ’n opgerolde blaar in die oor.

♦♦♦

Hou ’n bedekte warmwatersak teen die aangetaste kant van die gesig.

♦♦♦

Gebruik 'n spuit of iets soortgelyks om 2 tot 4 druppels warm olyfolie in die oor van ’n klein kindjie, 2 jaar en ouer, of 5 tot 10 druppels in ’n volwassene se oor.

♦♦♦

Drup een druppel warm amandelolie en een druppel knoffelolie in die oor. Plaas ’n pluisie watte in die oor.

♦♦♦

Vir oorpyn, skil ’n groot ui en sny dit in die helfte. Maak ’n helfte versigtig warm in ’n mikrogolfoond en draai dit toe in ’n lappie. Hou dit met die plat kant teen, of so naby as moontlik, aan jou oor. Pasop vir brand. Die aroma van die ui het antibakteriële eienskappe en die hitte help vir die pyn.

♦♦♦

Drup ’n paar druppels uiesap in die oor.

♦♦♦

Drup ’n paar druppels knoffelsap in die oor.

♦♦♦

Bind ’n teelepel peper toe in ’n lappie. Week die lappie in naeltjieolie en druk dit dan in die oor.

♦♦♦

Braai 'n heel knoffelhuisie in klapperolie. Laat die olie afkoel en gooi dan in oor.

♦♦♦

Druk 'n stukkie tabak in jou oor vir oorpyn.



Medisinale gebruike van kruie

Kruiegids

19.4.21

Die oor

Die oor is ’n orgaan wat ons gebruik om klankgolwe te registreer.

Die mens, het twee ore, een aan elke kant van die kop.

Die buitenste oor sluit die sigbare deel van die oor in, die uitwendige oorkanaal en die oortrom. Die oorskulp vang die klank op en gelei dit deur die uitwendige oorkanaal na die oordrom. Dié vibreer en verplaas die klank deur middel van die vibrasie na die gehoorbeentjies in die middeloor.

Die middeloor bevat die drie gehoorbeentjies – hierdie getal is 'n onderskeidende kenmerk tussen soog- en ander diere – twee spiersenings (vir die stapedius en tensor tympani spiere), en twee senuweebondels (die horisontale gedeelte van die gesigsenuwee, asook ’n takkie van die gesigsenuwee, genaamd die chorda tympani). Die buis van Eustachius verbind die middeloor met die farinks en het ten doel om drukverskille tussen die twee anatomiese areas uit die weg te ruim.

Die binne-oor bestaan uit die gehoororgaan (die koglea) en die labirint , ook genoem die vestibulêre apparaat, wat die balansorgaan is. Dié het drie halfmaanvormige kanale en die vestibule. Binne-in die koglea lê drie ander kanale: die timpaniese kanaal, die vestibulêre kanaal, en die middelkanaal. As klank die koglea tref, beweeg die vloeistof daarbinne. Dié beweging stimuleer Corti se orgaan, wat binne-in die middelkanaal lê, wat dan die klank ontleed en die inligting daaroor deur middel van die gehoorsenuwee na die brein toe stuur.

Dele van die oor
Oorskulp
Die oorskulp bestaan hoofsaaklik uit kraakbeen wat met ’n dun en buigsame lagie vel bedek is. By die mens is die oorskulp nie baie belangrik nie en dit dra min by tot doeltreffende gehoor.

Oorlel
Die buitenste gehoorgang is sowat 2 cm lank. Growwe hare groei dikwels daarin en kliere in sy wande skei ’n wasagtige stof af wat uitdroog en soms deur die bewegings van die kop losgeskud word.

Trommelvlies
Die trommelvlies of oortrom is oor die binneste end van die buitenste gehoorgang gespan. In ’n gesonde oor is dit so dun dat dit amper deurskynend is.

Gehoorbeentjies
Die gehoorbeentjies word die hamer, die aambeeld en die stiebeuel genoem omdat hulle na hierdie voorwerpe lyk. Die hamer is aan die trommelvlies verbind is, en die voetstuk van die stiebeuel pas oor ’n opening wat die ovale venster genoem word. Die aambeeld verbind die boonste gedeeltes van hierdie twee beentjies. As ’n geluid die oor bereik, tril die trommelvlies en die beweging word deur die beentjies op die ovale venster oorgedra. Dit is interessant dat die beentjies so gerangskik is dat klein bewegings van die oortrom baie groter bewegings by die venster veroorsaak.

Buis van Eustachius/oortrompet
Die buis van Eustachius of oortrompet verbind die holte van die middeloor met die van die neuskeelholte. Hierdie buisie laat toe dat lug by die middeloor kan in- en uitvloei om die druk daar dieselfde as die van die atmosfeer buite te hou. As die druk aan weerskante van die trommelvlies nie dieselfde is nie, kan dit nie behoorlik werk nie. Dit is die Eustachiese buis wat toegaan as ons voel dat ons ore toeslaan, en daarom help dit om te sluk of te nies sodat die buis weer kan oopgaan.

Ovale venster
Die ovale venster is in die beenopening tussen die middeloor en die inwendige oor. Dit word heeltemal deur die voetstuk van die stiebeuel en die klein ligamente daaromheen toegemaak.

Blasie
Die blasie (utriculus) en kleinere sakkie (sacculus) vorm die middelste gedeelte van die opvangselle van die middeloor. Hulle lê in die gedeelte van die benige labirint wat die voorhof genoem word. Binne hierdie twee organe is veselriffels wat van stand verander wanneer die kop gekantel word. Senuweeprikkels hou die brein op hoogte van die posisie van die kop.

Booggange
Die booggange lê agter die benige labirint. Elkeen van die drie halfsirkelvormige kanale vorm sy eie tonneltjie in die been. Die booggange is met ’n vloeistof gevul wat endolimf genoem word. Wanneer die kop beweeg, bly die vloeistof in minstens een van die kanaaltjies effens agter en die druk wat hierdeur veroorsaak word, veroorsaak dat senuweeboodskappe aan die brein gestuur word. Van hierdie boodskappe kan die brein vasstel in watter rigting en hoe vinnig die kop beweeg.

Slakhuis/cochlea
Die slakhuis of cochlea word so genoem omdat dit baie na die dop van ’n slak lyk (cochlea is Latyns vir slak). Sy breë kant raak aan die ovale venster. Beweeg die basis van die stiebeuel nou heen en weer, veroorsaak dit dat die endolimf in die slakhuis ook beweeg. Dit laat van die klein haartjies in die slakhuis beweeg. Van die wortels van hierdie haartjies gaan senuwee-impulse langs die gehoorsenuwee na die brein wat op sy beurt die sterkte en die toonhoogte van die klank ontleed.

8.3.21

Iets sit vas in my oor

Veral jong kinders druk vreemde voorwerpe in hul ore. Dit kan ook gebeur dat ’n insek in die oor vassit. Wanneer iets diep genoeg penetreer kan dit die oortrommel beskadig.

Simptome en tekens
• Pyn in die oor.
• Vibrasies in die oor indien dit ’n insek is.
• Gehoor van die oor is aangetas.

Behandeling
1. Moenie die voorwerp probeer uitkry nie.
2. Indien dit ’n insek is, kan jy lou water versigtig in die oorgooi om dit te probeer uitspoel.
3. Sorg dat die persoon by ’n hospitaal kom.

19.8.19

Vriesbrand

Vriesbrand kom voor wanneer die ekstremiteite van die liggaam (ore, neus, ken, hande, voete) blootgestel word aan langdurige of intense koue blootgestel word.

Die blootstelling kan oppervlakkig wees, waar slegs die vel gevries word, of dit kan diep wees, waar beide die vel en onderliggende weefsel gevries word. In ernstige gevalle kan gangreen ontwikkel.

Vriesbrand gaan soms gepaard met hipotermie. Hipotermie moet voor vriesbrand behandel word.

Simptome en tekens
• Prikkelende pyn in aangetaste deel, gevolg deur geleidelike gevoelloosheid.
• Beweging van die aangetaste deel is moeiliker.
• Die vel voel hard en styf.
• Die vel lyk oormatig wit of het blou spikkels.
Behandeling
1. Sorg dat die persoon binnemuurs is of ordentlike skuiling het.
2. Verwyder enige klerasie of bedekking om die aangetaste deel.
3. Maak enige beklemmende klerasie of juweliersware los.
4. Verwarm die aangetaste deel met jou liggaam.
5. Plaas die aangetaste deel nou in warm water – indien beskikbaar.
6. Indien die tekens en simptome binne ’n uur verbeter kan jy die behandeling staak, maar moet nie die persoon weer aan koue blootstel nie.
7. Lig die aangetaste deel op om swelsel en pyn te verlig.
8. Bedek die aangetaste deel met ’n sagte wondbedekking.
9. Neem die persoon na ’n hospitaal.

Waarskuwings
• Moenie die persoon op ontdooide voete laat loop nie.
• Moet nie die aangetaste dele vryf of masseer nie.
• Moenie blase oopbreek nie. • Moenie salf aan die aangetaste deel smeer nie.
• Moenie die aangetaste deel met droë of uitgestraalde hitte verwarm nie.


Stadia van vriesbrand

4.3.19

Nuwe hoop vir gehoorverlies

Navorsers aan Harvard en die University of Southern California het ’n nuwe benadering gevind tot die herstel van selle in die binneoor. Dit het die potensiaal om die gehoor te verbeter van miljoene mense wat aan gehoorverlies ly.

Die meeste mense oor die ouderdom van 70 jaar en omtrent 17% van persone in ontwikkelde lande sukkel met gehoorverlies.

Dit was nog altyd moeilik om medikasie toe te dien aan selle in die binneoor. Een van die probleme met medikasie in die binneoor is dat dit nie in plek bly nie. Die vloeistof in die area maak dit moeilik vir medikasie om goed te werk. Die nuwe navorsing het hierdie probleem aangespreek. Die fokus van die navorsing was spesifiek die koglea, die spiraalvormige orgaan in die binneoor waar baie sensitiewe selle voorkom wat klank na die brein herlei.

28.1.19

Ore wat jeuk

Indien jou ore jeuk, moet nie ’n voorwerp daarin druk om dit te probeer krap nie. Jy kan ernstige skade aanrig.

Die behandeling sal afhang van die oorsaak. Soms is dit gewoon stres wat dit veroorsaak, maar dit kan ook die begin van infeksie wees, of as gevolg van ’n velprobleem.

Die volgende is aanbevelings vir jeukerige ore:
• Sorg dat jou ore altyd skoon is. • Hou jou ore droog. • Probeer ’n paar druppels witasyn in die oor. • ’n Paar druppels olyfolie. • Hou ’n warmwaterbottel teen die oor – pasop vir brand, nie te warm nie.

5.4.17

Doofheid

Doofheid kom gereeld voor weens die gebrekkige ontwikkeling van die dele van die oor of die wisselwerking met die brein. Daar kan egter ook ander oorsake wees.

Doofheid kan ook veroorsaak word deur ’n besering wat oordele, senuwees of die breindeel wat vir gehoor verantwoordelik is beskadig.

Die opbou van oorwas kan ook tot doofheid lei.

Oordele soos die ossikels (gehoorbeentjies) kan mettertyd verhard en dit kan ook tot doofheid lei.

Daar is wel behandeling vir sekere oorsake van doofheid. ’n Gehoorapparaat of kogleêre inplantings kan sekere probleme help bekamp.

22.3.17

Middeloorontsteking

Middeloorontsteking is normaalweg die gevolg van ’n bakteriese of virale infeksie wat vloeistof in die middeloor agter laat opbou. Dit is die area agter die oordrom wat ontsteek. Dit kom algemeen voor by kinders.

Behandeling van die ontsteking is gewoonlik met antibiotika. Dit moet dus deur jou dokter gediagnoseer word.

In gevalle waar middeloorontsteking gereeld voorkom kan die dokter die inplanting van dreineringsbuise (grommets) voorstel. Dit is ’n eenvoudige prosedure en die pasiënt verlaat dieselfde dag nog die hospitaal.

4.4.16

Toets jou ore by die huis soos Nataniël

’n Nuwe Suid-Afrikaanse app kan jou gehoor toets en jou na die naaste oudioloog verwys as die toetsuitslag op ’n probleem dui.

11.11.15

Behandeling vir bloeding uit die oor

1. Plaas ’n persoon wat by sy/haar bewussyn is in ’n halfsittende posisie met die kop oorgebuig na die beseerde kant – sodat die bloed of vloeistof kan dreineer. Moet nooit die vloei uit die oor probeer keer nie, dit kan drukking in die middeloor laat opbou.
2. Bedek die oor met ’n steriele ongemedikeerde wondbedekking.
3. Toets die asemhalingstempo, pols en bewussynsvlak gereeld.
4. Behandel vir skok.
5. Indien die persoon bewusteloos is, maar normaal asemhaal, plaas in die herstelposisie.
6. Begin met kunsmatige asemhaling Indië die asemhaling of hartklop ophou.
7. Kry die persoon by ’n hospitaal.

4.11.15

Bloed uit die oor

In Oorpyn is daar verwys na die verskillende tipes bloeding wat van binne die oor kan voorkom.

Simptome en tekens:
• Pyn in die oor.
• Doofheid.
• Matige vloei van bloed (indien van binne die skedel).
• Skedelbreuk of ander kopbeserings.
• Hoofpyn.
• 'n Dun straaltjie strooikleurige vloeistof uit die oor.
• Bewusteloosheid.

Die persoon moet sodra moontlik by die hospitaal kom.

23.4.14

Nuwe otoskoop maak dalk diagnose by die huis moontlik

’n Nuwe otoskoop wat met jou slimfoon werk kan gebruik word om oorinfeksie te diagnoseer.

Dié instrument bied duidelike beelde van die die trommelvlies (timpaniese membraan) en kan dalk kort voor lank sorg dat jy nie meer die dokter hoef te besoek vir oorinfeksie nie. Jy kan slegs die foto’s aan jou dokter stuur vir ’n vinnige diagnose.