Soek op hierdie werf

Gebruik die alfabetiese gids om te soek vir mediese inligting of tradisionele boererate.

A B C D E F G H I J K L M N O P Q R S T U V W Z Medisinale gebruike van kruie Kruiegids



Showing posts with label Brein. Show all posts
Showing posts with label Brein. Show all posts

29.11.21

Hoë-vet diëte beïnvloed ook jou brein, nie net jou fisiese voorkoms nie

Daar was al heelwat navorsing oor hoe ’n ongesonde dieet met vetsug korreleer. Daar was nog nie ’n ondersoek van hoe jou dieet neurologiese veranderinge in die brein kan meebring nie. ’n Onlangse Yale-studie het ontdek dat hoë-vet diëte bydra tot onreëlmatighede in die hipotalamus-gebied van die brein, wat liggaamsgewig homeostase en metabolisme reguleer.

Die navorsers het bevestig dat inflammasie in die hipotalamus voorkom so vroeg as drie dae na die inname van 'n hoë-vet dieet, selfs voordat die liggaam tekens van vetsug begin toon.

Die studie is gepubliseer in die joernaal Cell Metabolism.

9.8.21

Oefening beskerm teen Alzheimer se siekte

Oefening op ’n daaglikse basis kan jou beskerm teen die kognitiewe agteruitgang toegeskryf aan Alzheimer se siekte. Dit het nie net ’n voordeel vir Alzheimer-lyers nie, maar bied ook beskerming teen normale kognitiewe agteruitgang wat met ’n hoër ouderdom gepaard gaan.

Die navorsers het ook bevind dat die verlaging van vaskulêre risikofaktore weens gereelde oefening addisionele beskerming bied teen Alzheimer se siekte.

Die navorsing is gedoen aan die Massachusetts General Hospital. Die studie is gepubliseer in die joernaal JAMA Neurology.

Vyf maande na die bogenoemde studie het die Duitse Sentrum vir Neurodegeneratiewe Siektes ook bevind dat daar ’n verband is tussen oefening en die brein se gesondheid. Die bevindings van hul 15 jaar studie is gepubliseer in die joernaal Mayo Clinic Proceedings.

24.8.20

Die brein

Die brein is ’n jellieagtige orgaan wat deur die skedel en harsingrugmurgvog beskerm word. Dit is die liggaam se beheersentrum en hanteer alle liggaamsfunksies. Hierdie funksies is in spesifieke dele van die brein gesetel. Indien ’n area van die brein beskadig word, word die funksies geassosieer met die area ook beïnvloed.

’n Volwasse brein weeg ongeveer 1,4 kg. Dit bestaan uit drie belangrike del: die serebrum (grootharsings), die serebellum (kleinharsings) en die breinstam. Die serebrum maak 90% van die brein uit en bestaan uit twee helftes. Die linkerkant beheer spraak en denke en die regterkant kreatiewe gedrag. Die serebrum beheer alle bewuste funksies, soos die geheue, leervermoë, spraak en bewuste beweging Die breinstam (verlengde rugmurg) beheer alle onwillekeurige funksies soos asemhaling, hartslag en spysvertering. Spierkoördinasie word deur die serebellum.

Om die liggaam te beheer stuur en ontvang die brein boodskappe as prikkels elektriese energie. Energie beweeg via die neurone (senuselle). Die neurone loop af by die rugmurg na die res van die liggaam. Elke neuron eindig in ’n fyn vertakking wat dendriete genoem word. Die brein self bevat sowat 15 miljard selle. Elke minuut beweeg daar sowat 0,85 liter bloed deur die brein per minuut.

25.11.19

Hierdie dieet goed vir jou brein

Mense met ’n dieet ryk aan groente, vrugte, neute en vis het waarskynlik groter breine. Dit is volgens ’n studie gepubliseer in die joernaal Neurology®.

Mense met ’n groter brein het gewoonlik beter kognitiewe vermoëns.

Die studie het bevind die beste dieet bestaan uit groente, vrugte, neute, volgraan, suiwel en vis, maar ook ’n beperkte hoeveelheid suikerhoudende drankies.

Behalwe dieet is daar ook bevind dat die volgende faktore ’n invloed het op breinvolume: hoë bloeddruk, rook en fisieke aktiwiteit.

Die studie is uitgevoer op ’n paar duisend Nederlanders. Meer navorsing is waarskynlik nodig om die bevindings te bevestig.

Die navorsers is verbonde aan Erasmus Universiteit Rotterdam.

2.10.18

Breinkanker

Primêre breinkanker is kanker wat in die brein begin. Metastatiese kanker in die brein is kanker wat van elders afkomstig is en versprei het na die brein. Eersgenoemde is uiters skaars.

Simptome van kanker in die brein sluit in hoofpyn (meesal in die oggend), sensoriese versteurings (veranderings in vermoë om te praat, hoor of sien) en gestremdheid van geheue of koördinering.

Breinkanker word gewoonlik behandel met chirurgie of bestraling. Chemoterapie is minder effektief vir hierdie tipe kanker.


Area’s waar breinkanker gewoonlik voorkom.

30.4.18

Vis geassosieer met ’n hoër IK en beter slaap

Kinders wat minstens een keer per week vis eet, slaap beter en het IK-tellings wat gemiddeld 4 punte hoër is as diegene wat minder gereeld of glad nie vis eet nie.

Heelwat studies het alreeds ’n verband getoon tussen omega-3's, die vetsure in baie soorte vis, en verbeterde intelligensie, sowel as omega-3's en beter slaap. Maar die verband is nog nie voorheen bevestig nie.

Navorsing deur die Universiteit van Pennsylvania het nou ’n verband gevind en beklemtoon ook die belangrikheid van slaap. 541 kinders is in die studie betrek.

Die navorsers het voorgestel dat kinders op ’n jong ouderdom blootgestel word aan vis. Kinders is sensitief vir vreemde reuke en as hulle nie vroeg aan vis gewoond raak nie, kan hulle deur die reuk afgesit word.

Die navorsing is gepubliseer in die joernaal Scientific Reports.

7.3.18

Slimfone tas jou brein aan

Navorsers het ’n wanbalans gevind in die breinchemie van jongmense verslaaf aan slimfone en die internet.

Mense is toenemend meer afhanklik van slimfone en ander draagbare elektroniese toestelle vir nuus, inligting, speletjies en vele meer.

Daar is ’n besorgdheid dat jongmense te veel tyd spandeer in hul fone in plaas daarvan om met ander te kommunikeer. Daar is ook vrae rakende die onmiddellike effek van slimfone op die brein en die moontlike langtermyn gevolge daarvan.

Navorsers aan die Koreaanse Universiteit in Seoul, Suid-Korea, het magnetiese resonansie-spektroskopie gebruik om unieke insig te verkry in die brein van slimfoon- en internetverslaafde tieners. Hierdie tipe spektroskopie meet die brein se chemiese samestelling.

Die bevinding was dat dat die verslaafde tieners aansienlik hoër tellings gehad het in depressie, angs, slapeloosheid en impulsiwiteit. Volgens die spektroskopie was daar beslis chemiese veranderinge in die breinkorteks van die verslaafde tieners, veranderinge wat geassosieer word met ’n aantal newe-effekte, insluitend slapeloosheid en angs.

Die goeie nuus is dat die chemiese balans genormaliseer het ná kognitiewe gedragsterapie.

19.1.18

Rugby verander jou brein

Een seisoen van rugby speel verander jou brein. Die veranderinge is soortgelyk aan harsingskudding, net minder ernstig.

Dit is die bevinding van navorsers aan die Western University in Kanada. Hulle het gesofistikeerde magnetiese spektroskopie gebruik om die breine van jong vroulike rugbyspelers te bestudeer; voor en na ’n seisoen.

’n Gevolg van harsingskudding is ’n afname in jou vlakke van glutamien. Die navorsers het bevind alle rugbyspelers verloor glutamien is een of ander mate. Glutamien is ’n interessante metaboliet wat betrokke is by verskillende prosesse in die brein.

Die studie is gepubliseer in die Januarie-uitgawe van die joernaal Human Brain Mapping.

1.3.17

Groot epilepsie

Die meeste groot epileptiese toevalle kom onverwags. Soms het die persoon wel ’n gevoel of een of ander ander aanduiding dat iets verkeerd is.

Simptome en tekens
• Die persoon raak skielik bewusteloos en val – soms gee die persoon ’n vreemde skree.
• Die persoon kan vir ’n paar sekondes verstyf en asemhaling kan ophou. Die mond en lippe sal blou word en die gesig en nek kan saamtrek.
• Die spiere ontspan dan en begin krampagtig saamtrek. Asemhaling kan dan moeilik wees en skuim kan by die mond uitkom. Die persoon kan ook beheer verloor oor hul blaas.
• Die spiere sal uiteindelik ontspan, maar die persoon sal nog ’n paar minute lank bewusteloos wees.
• Die hou gewoonlik nie langer aan as 5 minute nie. Daarna sal die asemhaling weer normaal word en die persoon sal wakker word, maar kan bedwelmd en deurmekaar voorkom.

Lees meer oor epilepsie en wat jy moet doen as iemand ’n aanval beleef.

27.2.17

Daar is hoop vir die behandeling van Alzheimer se siekte

In ’n navorsingsprojek aan die Universiteit van Manchester in Brittanje is ’n eksperimentele model van Alzheimer se siekte suksesvol behandel met antiinflammatoriese medikasie. Die navorsingspan het daarin geslaag om geheueverlies en inflammasie van die brein in muise heeltemal om te keer. Die navorsing dui ook op ’n moontlike sterk verband tussen inflammasie van die brein en Alzheimer se siekte.

Die meeste mense neem op een of ander stadium van hul lewens ’n nie-steroïede antiinflammatoriese middel. Die navorsing toon dat sekere van hierdie middels moontlik gebruik kan word om skade aan breinselle te verhoed en selfs te herstel. Dit is ook belangrik dat die medikasie reeds in gebruik is, wat die ontwikkeling van nuwe demensie medikasie aansienlik sal verhaas.

Daar word tans voorberei vir fase twee van die studie wat sal begin fokus op die gebruik van die middels vir die mens.

Die studie is gepubliseer in die joernaal Nature Communications.



(foto: University of Manchester)

30.1.17

Harsingdruk

’n Uiters ernstige toestand waar druk op die brein uitgeoefen word deur bloed wat in die skedel versamel of deur die been weens ’n fraktuur.

Harsingdruk kan op harsingskudding volg en kan tot 48 uur later ontwikkel, nadat ’n persoon skynbaar herstel het van harsingskudding.

Simptome en tekens
• Asemhaling word raserig
• Temperatuur kan styg – die gesig word blosend maar bly droog
• Pols is vol en bonsend, maar stadig
• Die pupille kan verskillende groottes hê
• Die een kant van die lyf kan swak voel of verlam wees

18.1.17

Die behandeling van harsingskudding

Harsingskudding is ’n tydelike breinversteuring. Dit word ook soms “konkussie” genoem.

1. In minder ernstige gevalle moet jy die persoon net gereeld monitor en voorstel dat julle ’n 1. dokter gaan spreek/2 dokter besoek.
2. Behandel vir skok indien nodig.
3. Kyk gereeld na die persoon se asemhaling, pols en bewussynsvlak. Kyk ook vir tekens van harsingdruk.
4. As daar enige twyfel is oor die persoon se toestand, sorg dat die persoon na ’n hospitaal geneem word.

11.1.17

Harsingskudding

Harsingskudding is ’n tydelike breinversteuring. Dit word ook soms “konkussie” genoem.

Harsingskudding is gewoonlik die gevolg van ’n hou teen die kop, ’n val van ’n hoë plek of ’n ongeluk.

Dit kan voorkom sonder dat die persoon bewusteloos is of net vir ’n kort tyd bewusteloos is.

Omdat harsingskudding harsingdruk kan voorafgaan is dit baie belangrik dat persone met die toestand baie fyn dopgehou word. Indien die simptome voortduur of die persoon se toestand versleg moet hulle dadelik by ’n dokter uitkom.

Simptome en tekens
• Kort of ’n gedeeltelike verlies van bewussyn

Indien die persoon bewusteloos is, kan die volgende simptome en tekens voorkom:
• Vlak asemhaling
• Bleek in die gesig
• Die vel is koud en klam
• Die pols is vinnig en swak

Wanneer die persoon besig is om te herstel kan die volgende simptome en tekens voorkom:
• Naarheid
• Die persoon kan nie gebeure net voor en na die insident onthou nie

4.1.17

Kopbeserings

Kopbeserings kan die brein beskadig. Indien dit gebeur kan die persoon deurmekaar wees of bewusteloos raak. Harsingskudding of –druk en ander gepaardgaande beserings kan volg.

Met kopbeserings is ’n deeglike ondersoek dus noodsaaklik. ’n Regstreekse hou teen die kop wat hard genoeg is om ’n kopvelwond of kneusplek te veroorsaak, kan ook skedelbreuk tot gevolg hê. Hierdie tipe beserings moet dus dringende mediese aandag kry. As die skedel dun is, kan ’n fraktuur aanwesig wees sonder dat daar enige tekens van uitwendige skade is.

Kopbeserings kom gereeld voor by: ’n val, veral by bejaardes, siekes en dronk persone; padongelukke; sportbeserings of in hoërisiko-beroepe soos konstruksie of mynbou.

30.11.16

Die outonome senuweestelsel

Die outonome senuweestelsel is ’n netwerk van senuwees wat onwillekeurige spiere beheer. Dit is spiere wat noodsaaklike funksies van die liggaam soos sirkulasie, asemhaling en spysvertering reguleer. Die stelsel werk aanhoudend, of die persoon nou wakker is of slaap. Dit hou selfs aan wanneer die res van die brein doodgaan.

23.11.16

Die senustelsel

Die senuweestelsel bestaan uit die brein, die rugmurg en senuwees.

Die brein bestaan uit ’n massa senuweeselle. Hierdie selle ontleed sensasies en gee bevele aan die spiere. Die brein dryf in ’n vloeistof en is omring deur die skedel. Dit beskerm die brein teen beskadiging.

Die rugmurg bestaan uit ’n massa senuweevesels wat aan die brein verbind is deur ’n opening aan die basis van die skedel. Hierdie vesels loop deur die nek en die ruggraat.

Laastens is daardie randsenuwees. Dit kom voor in pare, ’n motoriese senuwee en ’n sensoriese senuwee. Die sensoriese senuwee vervoer sensasies na die brein en die motoriese senuwee bring bevele vanaf die brein.

(grafika: Blausen Medical Communications, Inc)

5.10.15

Glutamaat is belangrik vir jou brein en liggaam

Glutamaat is ’n aminosuur met verskeie funksies. Dit reguleer byvoorbeeld insulienproduksie in die pankreas en is ’n belangrike oordragstof in die brein. Navorsers aan die Universiteit van Genève het nou ook vasgestel dat die brein gebruik glutamaat vir energie, wat belangrike implikasies vir die res van die liggaam het.

Die brein kan nie sy energie van lipiede kry soos ons ander organe nie. Die bloedbreinskans, wat die brein beskerm teen patogene en ander gifstowwe wat in die bloed sirkuleer, laat nie lipiede deur nie. Die meeste organe het ook die vermoë om glukose te stoor deur meer gewig aan te sit. Die brein, vasgevang tussen kraniale bene, kan nie gewig aansit nie en dus nie glukose stoor nie. Die brein moet deurlopend suikers van die res van die liggaam kry, ’n proses wat beheer word deur die lewer.

Die navorsers het vasgestel dat indien daar nie ’n voldoende vlak van glutamaat in die brein teenwoordig is nie, die brein die lewer aanpor om meer glukose te stuur – ten koste van die res van die liggaam. Die brein sal altyd sorg dat dit eerste in die ry staan vir glukose. Indien die lewer nie genoeg glukose in voorraad het nie sal dit die proteïene in die spiere tap vir glukose, wat lei tot ’n verlies in spiermassa.

Die vlak van glutamaat in die brein is dus van uiterste belang vir ons algemene gesondheid.

18.11.14

Slaap is goed vir die brein

Daar is nou bewyse vir hoe minder ouer volwassenes slaap, hoe gouer verouder hulle brein. Met ouer word daar bedoel persone van 55 jaar en ouer.