Hooikoors

Hooikoors is een van die algemeenste allergieë. Omtrent 20% van alle mense sukkel daarmee, mense in stede meer as op die platteland. Dit staan ook bekend as allergiese rinitis.

Dit het niks met hooi te doen nie; dit is ’n reaksie op stuifmeel. Dit irriteer die slymvliese en laat die neus, keel en oë jeuk. Die neusgange swel op en verstop, die neus drup en die oë raak rooi en seer.

Mense maak gewoonlik van neussproeie gebruik om simptome te verlig. Ongelukkig bring dit net tydelike verligting en wanneer die medikasie uitgewerk het swel die membrane nog meer as vantevore. Die sproei kan ook die beskermende slym in die neus uitdroog.

As jy te lank hierdie middels gebruik kan jou liggaam ophou reageer daarop.

Antihistamientablette is doeltreffend, maar kan ’n verdowende uitwerking op die liggaam hê. Indien jy nie van die reaksie hou nie kan jy plaaslike antiinflammatoriese behandelings, soos neus- of oogdruppels, gebruik wat antihistamiene of steroïede bevat, maar nie lomerigheid veroorsaak nie.

Boereraat:

’n Lagie petroleumjellie in jou neus kan help om stuifmeel op te vang.


Medisinale gebruike van kruie

Kruiegids

(foto: Petr Kratochvil)

Ore wat jeuk

Indien jou ore jeuk, moet nie ’n voorwerp daarin druk om dit te probeer krap nie. Jy kan ernstige skade aanrig.

Die behandeling sal afhang van die oorsaak. Soms is dit gewoon stres wat dit veroorsaak, maar dit kan ook die begin van infeksie wees, of as gevolg van ’n velprobleem.

Die volgende is aanbevelings vir jeukerige ore:
• Sorg dat jou ore altyd skoon is. • Hou jou ore droog. • Probeer ’n paar druppels witasyn in die oor. • ’n Paar druppels olyfolie. • Hou ’n warmwaterbottel teen die oor – pasop vir brand, nie te warm nie.

Sweisoë

Wanneer die oë te lank blootgestel word aan skerp lig, kan die horingvlies van die oog beskadig word. Dit is uiters pynlik en kan tot ’n week duur daarvoor begin verbeter. Dit word maklik voorkom deur ’n sonbril te dra.
Die toestand kan veroorsaak word deur die weerkaatsing van die son of die ultravioletlig van sweiswerk.

Simptome en tekens
• Intense pyn in die oë, dit kan voel asof daar sand in die oë is
• Die oë is rooi, waterig en gevoelig vir lig

Behandeling
1. Spoel die oë uit met koue water.
2. Verbind die oë liggies met oogkussings.
3. Kry mediese hulp.

Langtermyn gebruik van kafeïen kan Alzheimer se siekte vererger

Dit is algemeen bekend dat geheueprobleme kenmerkend is van Alzheimer se siekte. Dit word ook gekenmerk deur neuropsigiatriese simptome, wat reeds in die vroeë stadia van die siekte voorkom. Laasgenoemde gedrags- en sielkundige simptome sluit in angs, apatie, depressie, hallusinasies, paranoia en nog ander. Dit is deel van ’n verskeidenheid simptome wat op verskillende maniere manifesteer, afhangende van die individuele pasiënt. Hierdie simptome word beskou as die sterkste bron van nood vir pasiënte en versorgers.

Koffie, of kafeïen, is onlangs voorgestel as 'n strategie om demensie te voorkom, beide by pasiënte met Alzheimer se siekte en by normale verouderingsprosesse, maar daar is egter nou bewyse dat kafeïen die teenoorgestelde effek kan uitoefen.

Navorsers verbonde aan die Karolinska Universiteitshospitaal in Stockhölm, Swede, het bevind dat die langtermyn gebruik van kafeïen neuropsigiatriese simptome in diegene met Alzheimer se siekte kan vererger.

Die navorsing is aangevoer deur wetenskaplikes verbonde aan Universitat Autonoma de Barcelona in Spanje.

Leukemie

Leukemie is 'n tipe kanker. Die onbeheersde verdeling van kankerselle veroorsaak dat normale witbloedselle, rooibloedselle en plaatjies uit die beenmurg verdring word.

Verskeie faktore speel 'n rol in die ontstaan van leukemie. Navorsing het bewys dat genetika 'n oorheersende rol speel in die ontwikkeling van die siekte. 'n Persoon wat tot 'n familie behoort waar iemand leukemie gehad het, het 'n genetiese pre-disposisie om ook die siekte te ontwikkel.

Akute leukemie kom algemeen voor in persone onder die ouderdom van 20. Chroniese leukemie tas gewoonlik slegs volwassenes bo die ouderdom van 40 jaar aan. Dit is ook bewys deur navorsing dat meer mans as vrouens geneig is om leukemie te ontwikkel, hetsy akuut of chronies.

Die behandeling van akute leukemie geskied hoofsaaklik in drie fases. Tydens fase 1 word die pasiënt behandel met chemoterapie wat die selle vernietig. Sodra bepaal is dat al die kwaadaardige (maligne) selle vernietig is, verkeer die pasiënt in 'n toestand van remissie.

In fase 2 word lae dosisse chemoterapie toegedien om te keer dat die pasiënt nie weer maligne selle ontwikkel nie. Fase 3 word die instandhoudingsfase genoem. Pasiënte word deurgaans gemonitor oor 'n tydperk van 'n paar jaar om te verseker dat die pasiënt in remissie bly. Die pasiënt sal elke paar maande vir 'n lumbale punksie gaan om te kyk of daar enige abnormale selle teenwoordig is. Indien daar weer abnormale selle teenwoordig is, word weer begin by fase 1. Pasiënte moet ook dopgehou word vir enige kliniese tekens wat kan dui op die ontstaan van akute leukemie.

Pasiënte wat chroniese leukemie ontwikkel, is gewoonlik baie ouer. Chroniese leukemie het ook nie 'n merkwaardige uitwerking op die gesondheid van die pasiënt nie. Dokters verkies om nie pasiënte met chemoterapie (sitostatiese middels) te behandel nie. Behandeling word hoofsaaklik gegee om simptome te verlig.

Chroniese leukemie word hoofsaaklik behandel met bloedoortapping. Pasiënte is geneig om baie anemies te raak, wat veroorsaak dat hulle geweldig moeg is. Gereelde bloedtransfusies bring verligting van simptome.

Elektriese brandwonde

Hierdie tipe brandwond kom voor wanneer elektrisiteit met ’n sterk spanning en stroom deur die liggaam gaan.

Die meeste skade kom voor naby die ingangs- en uitgangspunte. Hoewel slegs ’n klein brandwond sigbaar kan wees kan die skade aan die onderliggende weefsel aansienlik meer wees. Dit kan ook die asemhaling en hartklop beïnvloed.

Moet nie die persoon nader nie, tensy jy seker is die elektrisiteit is afgeskakel.

Simptome en tekens
• Rooiheid, swelsel, verskroeiing en verkoling naby die ingangs- en uitgangspunte.
• Moontlik bewusteloos.
• Asemhaling en hartklop kan ophou.
• Simptome en tekens van skok.

Behandeling
1. Plaas ’n steriele wondbedekking van skoon nie-donsige materiaal op die wond. Maak dit met ’n verband vas.
2. Behandel vir skok.
3. Begin met kunsmatige asemhaling indien nodig.
4. Plaas die persoon in die herstelposisie indien bewusteloos.
5. Kry die persoon by ’n hospitaal sodra moontlik.

MOENIE wasmiddels of salf aanwend nie.
MOENIE blase stukkend maak of los vel verwyder nie.

Kruie vir kwale: Omlope

Maak ’n pasta van gelyke dele heuning en kaneel.
Smeer soggens en saans aan die omlope.
Gebruik vir ten minste twee weke.

♦♦♦

Kruisement-olie help vir omlope. Masseer 'n druppel olie aan die area.

♦♦♦

Medisinale gebruike van kruie

Kruiegids