Hoofpyn

Algemene hoofpyn word veroorsaak deur faktore soos spanning, allergieë, sinusitis, hormoonwanbalans, koors, hoofbeserings en die toksiese uitwerking van alkohol en dwelms.

Pyntablette bring wel tydelike verligting, maar kan op die lang duur die lewer en niere benadeel. Die onderliggende oorsaak moet behandel word.

Soek mediese hulp indien dit gereeld voorkom of voortduur, met ondraaglike pyn gepaardgaan en indien koors of ´n stywe nek voorkom.

Boereraat:

Gooi een eetlepel heuning in ’n glas warm water en drink.

♦♦♦

Meng een teelepel heuning saam met ’n koppie swart koffie en drink.

♦♦♦

Meng 1 eetlepel kasterolie en 1 eetlepel paraffien en smeer dit oor jou slape en voorkop. Gaan lê ’n rukkie.


Medisinale gebruike van kruie

Kruiegids

Hormoonvervangingsterapie (HVT)

Hormoonvervangingsterapie (HVT) skakel die simptome van menopouse uit, help met vaginale droogheid, vul verlore estrogeen aan en verlaag die risiko van osteoporose en hartsiektes.

Estrogeen kan per pil geneem word, met 'n plakkertjie, deur 'n inplanting elke ses maande of deur 'n jel wat op die vel gevryf word.

HVT hou wel risiko's in. Die risiko van baarmoeder- en borskanker neem toe. Vroue met 'n geskiedenis hiervan moet HVT vermy.

Vroue kan ook baat vind by plantmedisyne wat natuurlike estrogeen (fitoëstrogeen) bevat. Kruie bekend as adaptogene en homeopatiese middels soos Sepia en Pulsatilla is baie gewild.

Om te bepaal of hormoonterapie 'n goeie behandeling vir jou is, praat met 'n dokter oor jou individuele simptome en gesondheidsrisiko om lastige menopousale simptome te hê, hersien behandelingsopsies op 'n gereelde basis met jou dokter.

Kruie vir kwale: Impotensie

Die Zoeloes gebruik die bol van wildeknoffel vir die behandeling van impotensie. Wetenskaplike navorsing het reeds bevestig dat die plant testosteroonvlakke kan verhoog (Ebrahim & Pool, 2010).
Een plant se bol word fyngedruk en in melk gekook vir 10 minute. Klein bietjies van die aftreksel word dan in die oggend en aand gedrink. Navorsers stel voor dat hierdie aftreksel effektief gebruik kan word deur dit 2 ure voor seksuele omgang te drink. Hulle het ook bevind dat dit effektief kan bly vir 4 tot 6 ure. (Ojewalo, 2007)

(Ebrahim, M & Pool, EJ. The effect of Tulbaghia violacea extracts on testosterone secretion by testicular cell cultures. Journal of Ethnopharmacology. 2010)
(Ojewole, JAO. African traditional medicines for erectile dysfunction: elusive dream or imminent reality. Cardiovascular Journal of Africa. 2007)

Medisinale gebruike van kruie

Kruiegids

(foto: Artem Podrez)

Inkontinensie

Inkontinensie is die onvermoë om urien of ontlasting in te hou.

Daar word normaalweg onderskei tussen twee soorte inkontinensie; druklek-inkontinensie (stress incontinence) en paradoksale inkontinensie.

Druklek-inkontinensie is spasmodiese inkontinensie weens intraäbdominale druk. Die drukking word veroorsaak omdat daar onvoldoende afsluiting is. Die hoofoorsaak van onvoldoende afsluiting is meesal swangerskap en kraam.

Rookgewoontes, oorgewig, hardlywigheid en asemhalingsprobleme kan druklek-inkontinensie vererger.

Aanvanklik mag die lek van slegs enkele druppels uriene voorkom wanneer die lyer byvoorbeeld hoes of nies, terwyl enige fisiese inspanning uiteindelik tot urienvloei kan aanleiding gee.

Indien jy vermoed dat jy daaraan ly moet jy ´n dokter gaan spreek.

Paradoksale-inkontinensie kom voor weens die chroniese oorvulling van die blaas.

A-pokke

A-pokke is ’n aansteeklike virussiekte wat by mense en sommige diere voorkom. Die simptome sluit in koors, geswelde limfknope en ’n uitslag wat blase vorm en dan korsies oor die blase. Die tyd vanaf blootstelling tot aanvang van simptome wissel van 5 tot 21 dae. Die simptome duur tipies 2 tot 4 weke.

Die siekte word veroorsaak deur a-pokkevirus. Dit kan versprei deur besmette diere, liggaamsvloeistowwe, besmette voorwerpe of noue kontak met ’n besmette persoon.

Dit is aansteeklik vanaf die begin van simptome tot wanneer al die rowe afgeval het.

Die pokke-entstof is tans die beste beskerming teen infeksie. Antivirale middels word ook gebruik om dit te bekamp.

Die siekte is veral gevaarlik vir kinders, swanger vroue of mense met swak immuunstelsels. Histories het die risiko van dood gewissel van 0% tot 11%. Meer onlangs het die sterftesyfer gestyg van ongeveer 3 tot 6%. Die meeste pasiënte herstel.

Die siekte het waarskynlik toegeneem na die staking van roetine-pokke-inentings.

Volgens die departement van gesondheid is die siekte tans onder beheer in Suid-Afrika. Die Wêreldgesondheidsorganisasie het die huidige uitbraak van a-pokke amptelik as ’n openbare noodtoestand geklassifiseer.

Tot op hede (18 Augustus 2024) het 24 mense in Suid-Afrika die siekte sedert die uitbraak opgedoen, waarvan 3 oorlede is.

Impotensie

Impotensie (ook genoem erektiele disfunksie) is die onvermoë van 'n man om 'n ereksie te kry. Oorsake kan fisies of psigies wees.

Die algemeenste fisiese oorsake is verminderde bloedvloei en senuweeskade, wat die gevolg kan wees van diabetes, niersiektes, chroniese alkoholisme, tabakverslawing, veelvuldige sklerose, aterosklerose, vaskulêre siektes en neurologiese siektes.

Ongeveer vyf persent van 40-jarige mans en tussen 15 en 25 persent van 65-jarige mans ly een of ander tyd hieraan. Hoewel die voorkoms met ouderdom toeneem, is dit nie 'n onvermydelike deel van veroudering nie.

Tussen 35 en 50 persent van mans met diabetes ervaar ook impotensie.

Medisinale gebruike van kruie

Kruiegids

(foto: Andrew Neel)

Jig

Dit is ´n gewrigsontsteking wat voorkom wanneer daar te veel uriensuur in die bloed is. Hewige pyn is gewoonlik die eerste simptoom. Dan raak die aangetaste gewrigte ontsteek, rooi, geswel en seer - dit lyk of daar infeksie in is. Die gewrigte voel warm en is uiters gevoelig. Jig kom in die meeste gevalle in die groottoon voor. Hiernaas kan die enkel, knieë en polsgewrigte ook aangetas word.

Sny rooivleis, alkohol en tamaties uit jou dieet en maak seker 60% van jou dieet bestaan uit groen groentes. Drink baie water om jou niere te help om oortollige uriensuur uit te skei.

Spreek jou dokter vir ´n diagnose.