Kruie vir kwale: Insekbyt

Die blare van die varkblom kan gebruik word om die ongerief van insekbyte te verlig.

♦♦♦

Vryf die vars bokboegoe-blare op jou komberse en kussings om insekte, bv., muskiete, weg te hou in die nag.

♦♦♦

Plaas 20 g vars, gekapte wildewingerd-blare in 1 koppie kookwater en laat trek vir 5 minute.
Gebruik dit vir die behandeling van die bytplek van bosluise en ander insekte.

♦♦♦

Die jellieagtige inhoud van die medisynebossie kan op insekbyte gesmeer word.

♦♦♦

Maak ’n badmengsel deur 40 g wildeals-blare te bedek met 2 liter kookwater. Laat dit staan vir 2 uur.
Gooi deur ’n sif en botteleer.
Voeg die mengsel by jou badwater om te help met insekbyte. Jy kan die geaffekteerde plekke liggies daarmee afspons.

♦♦♦

Vryf rou, fyngekerfde wit uie aan ’n vlooibyt.

♦♦♦

Smeer suurlemoensap aan ’n perdeby- of bysteek.

♦♦♦

Gooi 1 liter kookwater oor 3 koppies blare, stele en blomme van wildedagga.
Laat dit trek en afkoel.
Gebruik dit op insekbyte.

Medisinale gebruike van kruie

Kruiegids

Gebruik 'n varkblom vir seerplekke

Die blare van die varkblom kan gebruik word om die ongerief van brandwonde en insekbyte te verlig en om sere en pitswere te behandel. Was die blare in warm water om dit te ontsmet en warm te maak en verbind die seerplek daarmee oornag. Herhaal soos nodig.

Die behandeling van bysteke

Die angel moet so gou moontlik met ’n stomp voorwerp afgeskraap word. ’n Angel kan gif vir tot 20 minute lank in die wond pomp.

Bedek die plek met ’n verband wat in ’n koeksoda-oplossing geweek is.

Indien die persoon ’n ernstige reaksie toon moet hulle sodra moontlik by die hospitaal gekry word. Pas kunsmatige asemhaling toe indien nodig.

Moenie die persoon dwing om te lê nie. In sulke gevalle is dit soms gemakliker vir die persoon om regop te sit. Steun hul arms op kussings.

Boereraat:

Indien ’n bysteek jou irriteer kan jy die area natmaak en ’n aspirientablet oor die bytplek vryf. Onthou egter dat ’n ernstige reaksie dadelik by ’n hospitaal behandel moet word.

Spinnekopbyt

Knopiespinnekoppe is die enigste werklik gevaarlike spinnekop in Suid-Afrika.

Twee soorte kom voor: die swartweduwee wat voorkom in die graanlande van die Suidwes-Kaap en geïdentifiseer kan word deur ’n karmosynrooi lyn of kol op die dorsale oppervlak; en die bruinweduwee wat algemeen voorkom binne en rondom geboue en geïdentifiseer kan word deur ’n oranje merk in die vorm van ’n uurglas aan die onderkant van die maag. Beide se gif tas die senuweestelsel aan, maar die swartweduwee is verreweg die gevaarlikste.

Simptome en tekens
• Die gif tas die senuweestelsel aan en dit bemoeilik asemhaling en kan die dood van ’n jong kind veroorsaak.
• Naarheid.
• Oormatige sweet.
• ’n Beklemmende, krampagtige borspyn soos in die geval van ’n hartaanval.

Swartweduwee

Bruinweduwee

Weeluis

’n Weeluis is ’n klein, plat, ovaalvormige bloedsuiende insek met ’n rooibruin kleur en kort vlerke. Die insek ruik sleg. Die weeluis kom voor in huise, veral beddens, vandaar die Engelse naam bed bugs. Dit kruip gedurende die dag weg en kom saans uit om die bloed van mense en ander soogdiere te suig. Afhangende van die temperatuur en voedselbron kan twee tot vier geslagte jaarliks uitbroei.

Simptome en behandeling
Hulle bytplekke op die vel kan irritasie veroorsaak. ’n Kalamyn-oplossing kan verligting bied hierteen. As jy enige erger reaksie het op die byt kan ’n antihistamien help.

Insekbyt

Kan jeukerig of rooi word, maar is gewoonlik onskadelik. Soms kan byte en steke siektes of allergieë veroorsaak. Die reaksies op hierdie wonde hang af van die gevolge van die gif asook van die allergiese reaksie van ´n oorgevoelige persoon.

Spreek jou dokter oor ernstige byte of as jy ´n allergiese reaksie toon.

Boereraat:

Indien ’n muskietbyt jou irriteer kan jy die area natmaak en ’n aspirientablet oor die bytplek vryf.

♦♦♦

Smeer tandepasta aan ’n bysteek.

♦♦♦

Vir muskietbyte kan jy pasta van koeksoda en water aansmeer om van die ergste swelling en jeuk ontslae te raak.

♦♦♦

Vir ’n muskietbyt meng jy ’n bietjie Engelse sout en warm water. Doop ’n stukkie watte daarin en plaas die watte op die bytplek.

♦♦♦

Krap 'n by-angel met 'n mes uit. Was die plek met soutwater.

♦♦♦

Krap 'n by-angel met 'n mes uit. Maak 'n pasta van sout en asyn en plaas dit op dit steekplek. Dit trek die gif uit.

♦♦♦

Meng klapperolie en blomswael en smeer aan plekke waar insekte jou gebyt het.

♦♦♦

Smeer asyn aan ’n perdebysteek.

♦♦♦

Vryf die binnekant van 'n piesangskil oor 'n plek waar 'n muskiet jou gebyt het. Dit verminder die swelling en jeuk.

♦♦♦

Krap 'n by-angel met 'n mes uit. Maak 'n koeksodapasta en plaas dit op dit steekplek. Dit trek die gif uit.

♦♦♦

Smeer 'n bietjie asyn op 'n bysteek nadat die angel afgekrap is – dit neem die brand weg.

Medisinale gebruike van kruie

Kruiegids

Behandeling van ’n insekbyt in die mond of keel

1. Gee die persoon ys om te suig om die swelsel te verminder. Of spoel die mond uit met koue water of ’n oplossing van water en koeksoda (’n teelepel per 250 mℓ water).
2. Indien die persoon moeilik asemhaal plaas hom/haar in die herstelposisie.
3. Kry die persoon by ’n hospitaal.

Bysteke

Bysteke veroorsaak meer mense se dood as haaiaanvalle, spinnekopbyte en slangbyte saam. Die slagoffers is gewoonlik allergiese mense wat nie gedesensiteer is nie. Enige persoon wat ’n ernstige reaksie op ’n bysteek toon moet sodra moontlik by ’n dokter kom.

Simptome en tekens

Allergiese persone sal kla dat hulle swaar asemhaal en die spraak kan belemmerd wees omdat die weefsel in die keel opswel.

’n Allergiese persoon moet so gou moontlik behandeling kry.

Die behandeling van ’n skerpioensteek

Vries die aangetaste deel vir 1 tot 2 uur lank deur ys daarop te hou. Jy moet binne 15 minute begin om doeltreffend te wees.

Indien die persoon swaar asemhaal moet jy sorg dat die persoon se lugweg oop is. Pas kunsmatige asemhaling toe indien nodig. Maak ook die persoon gemaklik deur hulle in die herstelposisie te plaas – indien hulle nie hulp nodig het met asemhaling nie.

Sorg dat die persoon so gou moontlik by ’n hospitaal kom. Hospitale het normaalweg die nodige teengif.

Skerpioensteke

Die gevaarlike skerpioene het klein knypers en groot sterte. Slagoffers word gewoonlik gesteek as hulle skerpioene versteur.

Simptome en tekens

Die steek is pynlik, maar duur slegs sowat 30 minute. Die gif kan die volgende gevolge hê:
• Stuiptrekkings
• Oormatige speekselafskeiding en sweet
• ’n Vinnige polsslag
• Belemmerde asemhaling

Behandeling van ’n spinnekopbyt

Die basiese behandeling van ’n spinnekopbyt behels dat jy moet sorg dat die persoon se lugweg oop is en asemhaal. Pas kunsmatige asemhaling toe indien nodig. Maak ook die persoon gemaklik deur hulle in die herstelposisie te plaas – indien hulle nie hulp nodig het met asemhaling nie.

Sorg dat die persoon so gou moontlik by ’n hospitaal kom. Hospitale het normaalweg die nodige teengif.