Soek op hierdie werf

Gebruik die alfabetiese gids om te soek vir mediese inligting of tradisionele boererate.

A B C D E F G H I J K L M N O P Q R S T U V W Z Medisinale gebruike van kruie Kruiegids



27.6.24

Lewer

Dit was 'n lang vakansie, vra maar jou lewer. Meeste van ons besef nie die belangrikheid van hierdie orgaan nie. Wanneer ons uitvind daar is iets fout is dit gewoonlik te laat en die skade is onherstelbaar. Deur na jou lewer te kyk kan die verskil tussen lewe en dood beteken.

Die lewer is jou liggaam se chemiese fabriek. 'n Ongesonde lewenstyl vernietig jou fabriek se selle. Driekwart van hierdie selle kan vernietig word voor jou lewer ophou funksioneer. Ongelukkig is ons selde bewus van enige skade voor dit te laat is.

So hoe hou ek my lewer gesond? Volg net hierdie maklike stappe:

Hou matigheid voor oë! Vir 'n gesonde lewer behoort jy nie meer as een glas wyn (125 ml vir vroue, 250 ml vir mans) per dag te drink nie.

Drink baie water.

Eet baie groente en vrugte. Jou lewer is versot op antioksidante uit die bronne. Ruil ook jou normale kookolie in vir ekstra suiwer olyfolie wat ryk is aan vitamien E en ander antioksidante.

Eet eiers, knoffel en uie. Dit help met lewerfunksie.

Jou dieet moet 'n lae glukemiese lading hê. Vermy suiker en verfynde koolhidrate.

Verloor gewig indien jy oorgewig is.

Dit is 'n goeie idee om nou bietjie meer as normaal by bogenoemde eetgewoontes te hou. Dit sal jou lewer help om te herstel na die vakansie.

25.6.24

Kruie vir kwale: Hoes

Die Zoeloes gebruik al lank reeds watersalie vir hoes. Die resep is twee blare in ’n koppie kookwater getrek vir 5 minute. Gooi deur ’n siffie en drink.

♦♦♦

Gooi ’n koppie kookwater oor ’n eetlepel geelblomsalie blare en laat dit trek vir 5 minute. Om dit meer drinkbaar te maak kan jy dit versoet met heuning en ’n skyfie suurlemoen byvoeg.
Die Nama mense gebruik al lank tee van geelblomsalie vir die behandeling van hoes. .

♦♦♦

Tee van die wilde salie word wêreldwyd gebruik vir die behandeling van hoes en ander borskwale.
Gooi ’n koppie kookwater oor ’n eetlepel wilde salie blare en laat dit trek vir 5 minute. Daarom meer drinkbaar te maak kan jy dit versoet met heuning en ’n skyfie suurlemoen byvoeg.
As jy hoes moet jy daarvan drink direk na die hoesbui. Jy kan ook ’n blaar kou om te help met hoes of ’n seer keel.

♦♦♦

Gebruik 10 g wildedagga-blare, stele en/of blomme om ’n tee mee te maak. Laat dit vir 5 minute trek voor jy dit deur ’n siffie gooi.
Drink dit vir hoes.

♦♦♦

Jy het ’n takkie kapokbos van omtrent jou duim se lengte nodig. Gooi ’n koppie kookwater daaroor en laat trek vir 5 minute.
Dreineer en voeg bietjie heuning en suurlemoensap by en drink dit vir hoes.

♦♦♦

Gooi ’n koppie kookwater oor ’n paar gedroogde takkies heuningtee en laat dit trek vir 20 minute. Drink dit ten minste 4 keer per dag vir hoes.

♦♦♦

Gebruik 10 g vars tiemie om ’n tee mee te maak. Laat dit vir 5 minute trek voor jy dit deur ’n siffie gooi. Roer 5 mℓ heuning by.
Drink die tee vir hoes.

♦♦♦

Plaas 5 g vars, gekapte wildewingerd-blare in 1 koppie kookwater en laat trek vir 5 minute.
Drink dit vir hoes.

♦♦♦

Plaas ’n ¼ koppie klimop-blare in 1 koppie kookwater en laat trek vir 5 minute.
Gooi deur ’n siffie en geur met heuning na smaak.
Drink dit vir hoes.

♦♦♦

Maak die wortel van die noem-noem skoon en maak fyn. Gebruik 2 teelepels in ’n koppie warm water. Drink dit vir hoes.

♦♦♦

Gooi ’n koppie kookwater oor ’n paar blare van die medisynebossie en laat trek vir 5 minute.
Gooi deur ’n sif en drink vir hoes.

♦♦♦

Voeg ’n paar wildeals-spruite by ’n bottel brandewyn. Laat staan vir ’n week en skud daagliks. ’n Eetlepel hiervan twee maal per dag vir hoes.

♦♦♦

Gebruik 5 g vars wildeals blare om ’n tee mee te maak. Laat dit vir 5 minute trek voor jy die blare verwyder. Roer 5 mℓ heuning by.
Drink die tee vir hoes.

♦♦♦

Gooi kookwater oor ’n teelepel bloekomblare (Eucalyptus globulus) gemeng met ’n teelepel bokboegoe (Coleonema pulchellum). Laat dit trek vir 5 minute. Gooi deur ’n siffie en drink vir hoes.

♦♦♦

Een teelepel boegoebrandewyn, twee maal per dag.
Lees hier hoe om boegoebrandewyn te maak.

♦♦♦

Kook ´n stuk saliebos in water tot die vloeistof lyk soos sterk tee.
Neem een koppie daarvan en kook dit tot ’n stroop saam met 500 ml suiker.
Voeg 1 botteltjie borsdruppels en 125 ml suurlemoensap by en skud goed.
Drink 15 ml hiervan 3 maal per dag.

♦♦♦

Sny ’n wit ui in dun skyfies en strooi bruinsuiker daaroor. Laat die staan sodat dit ’n stroop kan trek. Gee dan 5 mℓ van die stroop elke uur. Dit sal help vir hoes.

♦♦♦

Jy kan jou eie hoesstroop maak deur gelyke hoeveelhede suurlemoensap en heuning te meng.

♦♦♦

Peperwortel is jare gelede gereeld gebruik om hoes mee te behandel. Jy berei jou eie hoesstroop van die plant. Behou die wortel se skil, maar was en skrop dit deeglik. Sny dit dan in skyfies. Strooi ’n dik laag bruinsuiker oor en laat staan vir 24 uur. Dan gooi jy die los suiker af en kook die res op tot sag. Neem 5 mℓ wanneer jy ’n hoesbui het.

♦♦♦

Kou ses naeltjies en sluk die sap in.

♦♦♦

George Moore skryf:
"Man, ek het so 'n lelike hoesie gekry die winter toe sê 'n ou taante om die draai van my ek moet die volgende gebruik:
1 half jack gemmer brandewyn
1 middelslag ui
2 huisies knoffel
1 bottel heuning
Gooi die heuning en brandewyn in 'n potjie en verhit stadig maar nie kook nie, rasper dan die ui en knoffel baie fyn en gooi by die brandewyn en heuning laat so vir 10 minute staan en gooi in bottels maak seker dat die ui en knoffel gelyk verdeel is in al die bottels. Gebruik dan so 2 eetlepels op 'n slag vir hoes maar nou nie te veel nie anders moet 'n mens dan 'n raad vir wingerdgriep gaan soek. So elke 2 ure het gewerk vir my."


Medisinale gebruike van kruie

Kruiegids

20.6.24

Varkgriep / A/H1N1-virus


Varkgriep is ‘n respiratoriese griep wat hoofsaaklik deur die tipe A/H1N1- griepvirus veroorsaak word. Varkgriep het in die verlede geredelik tussen varke uitgebreek. Intussen het die virus ook by mense begin voorkom. Die eerste gevalle is laat Maart begin April 2009 gerapporteer. Hierdie gevalle het in Suid-Kalifornië en Texas in Amerika voorgekom. Die virus versprei tans van mens tot mens en daarom kan dit oor die hele wêreld voorkom.

Die simptome van varkgriep is soortgelyk aan die normale simptome van menslike griep.

Algemene varkgriep simptome

Seer keel
Hoes
Koors (Kinders het gewoonlik ook ‘n uitslag)
Moeilike asemhaling (Kinders het 'n vinnige en moeilike asemhaling)· Kortasem
Hoofpyn
Die hele liggaam kan pyn
Skielike duiseligheid
Diarree en naarheid word ook gerapporteer

Dit wil voorkom varkgriep met dieselfde metodes versprei as seisoenale griep. Dit word normaalweg van persoon tot persoon versprei op een van die volgende maniere:

Hoes en nies
Aanraking

Die volgende voorkomende stappe kan geneem word:

Was jou hande gereeld met seep en water
Probeer om nie aan jou oë, neus en mond te vat nie
Hou jou liggaam so gesond as moontlik
Slaap genoeg
Drink baie vloeistowwe (veral water)
Eet gesond
Probeer om nie oppervlaktes aan te raak wat dalk met die virus besmet kan wees nie
Vermy kontak met persone wat siek is

Sekere virusse kan langer as twee ure leef op byvoorbeeld, deurknoppe, tafels, ens.

Bly by die huis indien jy met die virus besmet is. Vermy sovêr moontlik naby kontak met ander mense. Bedek jou mond en neus met ‘n snesie wanneer jy hoes of nies. Gooi dit daarna onmiddellik in die asblik. Was jou hande met seep en water.

Indien of jou gesin simptome toon van varkgriep moet jy onmiddellik na jou huisdokter, naaste kliniek of hospitaal gaan.

Hoe lank duur varkgriep?

Die duur van varkgriep kan van persoon tot persoon verskil. Oor die algemeen duur die siekte gewoonlik ongeveer 7 tot 10 dae. Die erns en duur van simptome kan egter afhang van verskeie faktore, insluitend die individu se algemene gesondheid, ouderdom en enige onderliggende mediese toestande.

Vir hoe lank is varkgriep aansteeklik?

Vanaf 'n dag voor die eerste simptome verskyn tot omtrent 4 dae daarna.

19.6.24

Kruie vir kwale: Griep

Sommige mense maak ’n eksterne wasmiddel met kankerbossie vir griep. Hiervoor gebruik jy 4 hande vol blare van die kankerbossie, ’n fyngedrukte bol wildeknoffel en 4 hande vol kruidjie-roer-my-nie se blare. Alles saam word in kookwater getrek vir 30 minute. Die lyf word gewas terwyl die mengsel nog warm is en die pasiënt moet ook 125 mℓ van die mengsel drink. Die 125 mℓ moet egter afgetap word na 15 minute se trek. As dit te sterk is, kan dit die persoon laat opgooi. Hoe bitterder ’n kankerbossie-mengsel is, hoe sterker is dit.


♦♦♦

Neem 2 tot 4 blare van die kankerbossie en week dit 3 minute in ’n koppie kookwater. Volgens die Khoi kan jy hierdie flou tee kan jy drink vir griep.

♦♦♦

Plaas 10 g vars, gekapte wildewingerd-blare in 1 koppie kookwater en laat trek vir 5 minute.
Drink dit vir griep

♦♦♦

Voeg ’n kwart koppie kattekruid-blare by ’n koppie kookwater en laat trek vir 5 minute.
Gooi deur ’n sif en drink vir griep

♦♦♦

Drink die sap van een suurlemoen saam met warm water, 'n teelepel heuning en twee aspirientablette vir griep.

♦♦♦

Medisinale gebruike van kruie

Kruiegids

17.6.24

Ménière-siekte

Ménière-siekte is 'n aandoening van die balansorgaan in die middeloor. Die gevolge hiervan wissel van balansversteuring, gehoorverlies, abnormale gehoor, drukking in die oor en tinnitus. Indien jy enige van die simptome ervaar moet jy jou dokter gaan spreek.

Ons weet nog nie rêrig wat die oorsake van Ménière-siekte is nie. Dit kom voor asof dit te doen het met 'n abnormale hoeveelheid vloeistof in die middeloor of 'n abnormale samestelling van die vloeistof. Wat die verandering in die vloeistof meebring weet ons nog nie. Normaalweg ontstaan die siekte net in een oor.

Daar is nog nie medikasie wat suksesvol gebruik kan word vir Ménière-siekte nie. Gewoonlik skryf dokters medikasie voor vir die balansversteuring.

Verminder jou soutinname en vermy voedsel wat sogenaamde MSG's bevat. Eet ook kleiner porsies op 'n slag, versprei dus jou etes oor die dag. Dit help jou liggaam om die vloeistowwe beter te reguleer. Vermy drankies en voedsel wat kafeïen bevat en moet nie rook nie.

13.6.24

Kruie vir kwale: Ekseem

Sommige mense maak ’n eksterne wasmiddel met kankerbossie vir ekseem. Hiervoor gebruik jy 4 hande vol blare van die kankerbossie, ’n fyngedrukte bol wildeknoffel en 4 hande vol kruidjie-roer-my-nie se blare. Alles saam word in kookwater getrek vir 30 minute. Die lyf word gewas terwyl die mengsel nog warm is en die pasiënt moet ook 125 mℓ van die mengsel drink. Die 125 mℓ moet egter afgetap word na 15 minute se trek. As dit te sterk is, kan dit die persoon laat opgooi. Hoe bitterder ’n kankerbossie-mengsel is, hoe sterker is dit.

♦♦♦

Teeboom-olie (tea tree oil) help vir ekseem. Gooi 'n paar druppels in jou badwater.

♦♦♦

Laventel-olie help vir ekseem. Gooi 'n paar druppels in jou badwater.

♦♦♦

Rooibostee is ’n tradisionele teenvoeter vir ekseem. Maak ’n sterk pot rooibostee en voeg dit by jou badwater. Dit is ook geskik vir baba’s.

Jy kan die tee ook laat afkoel en dit op jou vel spat of jou vel daarmee afspoel. Of gebruik sommer n rooibos teesakkie en spons jou vel daarmee.

♦♦♦

Gousblom-tee help om ekseem en ander allergiese reaksies te verlig.

♦♦♦

Maak ’n tee met brandnetel en drink dit om jou allergiese reaksie te verlig.

♦♦♦

Meng 30 mℓ kremetart, 30 mℓ blomswael en 30 mℓ milk of magnesia met ’n potjie ongegeurde room (aquas cream). Smeer soggens en saans ’n bietjie aan die uitslag op jou vel. Dit is ook geskik vir kinders.

♦♦♦

Gooi 1 liter kookwater oor 3 koppies blare, stele en blomme van wildedagga.
Laat dit trek en afkoel.
Gooi dit by jou badwater vir ekseem.

♦♦♦

Voeg 'n paar takkies van ´n wilde daggaplant by jou badwater om ekseem te verlig.


Medisinale gebruike van kruie

Kruiegids

12.6.24

Maagseer

Koeksoda vir maagseer is nie soseer ’n goeie idee nie. Lees die laaste antwoord onder vir meer inligting.

Anoniem skryf: "Ek het spastiese kolon en daar is gediagnoseer dat ek kroniese infeksie van maag wand en ook blase op my dikderm en is daar enige dieet wat daarvoor kan help."

Antwoord: Dit is altyd moeilik met 'n kombinasie van probleme. Jy sal kan voordeel trek uit die raad wat hier onder gegee word, maar die aanbeveling is dat jy 'n dieetkundige gaan spreek. Dit sal wys wees as jy jou dokter toestemming gee om met jou dieetkundige oor jou toestand te praat.



Karlien skryf :
"My kerel se pa is baie siek. Hy het 3 jaar terug 4 hartomlynings gehad en van daar af was hy nog nooit gesond nie. Op die oomblik het hy 3 maagsere en blykbaar is 2 van hulle baie ernstig. Hy het spatare in sy slukderm wat ook baie ernstig is. Hy staan eintlik met een voet in die graf en die ander op die rand van die gat. Hy gaan aanmekaar na die dokters toe en hulle stop hom vol pille wat ek dink nie baie goed is nie, want a.g.v. sekere pille het sy gesondheid meer agteruitgegaan. Ons weet nie meer wat om te doen of na wie toe te gaan nie. Dit is baie ernstig en die raad en tyd raak minder. Ek wil net weet of die pille wat hy drink hom nie vererger nie, hy raak vinnig moeg, lam en geen krag en lighooftig."

Antwoord :
'n Maagseer (peptiese ulkus) is 'n rou seertjie wat in die voering van die maagwand of die boonste deel van die dunderm voorkom. 'n Maagpyn en 'n brandsensasie is gewoonlik 'n aanduiding van 'n maagseer. Braking kan voorkom, veral in die aand.
Maagsure wat deur die beskermde slymvlies van die maag vreet veroorsaak die pyn en medikasie wat die afskeiding van die maagsuur blokkeer bring gewoonlik net tydelike verligting aangesien die maagseer weer terugkeer. Navorsing toon dat dit die Helicobacter pylori bakterie is wat die maagwand irriteer en uiteindelik so verswak dat 'n maagseer ontstaan. Die bakterie veroorsaak 90% van alle maagsere. Die ander 10% word veroorsaak deur anti-inflammatoriese middels soos aspirien.
'n Kursus van antibiotiese middels behoort normaalweg die maagseer te genees.
Wat julle kan doen is om sy dieet te wysig sodat hy die optimale voeding kry wat sy immuniteit sal opstoot. Praat ook met sy dokter/s oor aanvullings sodat julle hom nie iets gee wat teen sy medikasie sal inwerk nie. Indien bakterieë sy maagseer veroorsaak het moet hy kos vermy wat ryk is aan yster. Dit help bakterieë om voort te plant. Knoffel, Sint Janskruid, avokado en vinkel bevat almal antibakteriële middels. Die kruid Echinacea is 'n algemene antibiotiese middel en molslaai het ook antibiotiese eienskappe.