Penis skoonmaak

Vanessa skryf: 

"My dogter het 'n week gelede mamma geword van 'n baba seuntjie. Ek het twee dogters groot gemaak en is dus heeltemal onkundig en wil graag raad vra oor hoe sy geslagsdeeltjie skoongemaak behoort te word? Wat is die moets en moenies? Is dit sommer ouvrou stories dat die velletjie kan vasgroei en moet mens daar peuter? Jou raad sal waardeer word."

Antwoord:

Moet glad nie daar peuter indien dit lyk asof die velletjie vassit nie! Dit is normaal vir die velletjie om vir nog lank daar vas te sit. Daardie velletjie moet nooit teruggeforseer word nie, dit sal vanself los raak soos hy ouer word! Meeste seuntjies s'n is los op twee jaar, maar dit kan ook eers op 5 jaar gebeur. Moet julle nie daaroor bekommer nie.

Was die baba maar soos normaalweg. Gedurende die eerste jaar het sy penis geen spesiale aandag nodig nie. Soos sy voorvel begin losser raak na 12 maande plus kan jy versigtig aan die binnekant daarvan met bietjie water skoonmaak, maar onthou asseblief dat die voorvel nooit verder teruggetrek moet word as wat dit kan gaan nie.

Indien die voorvel bietjie kan terugtrek wanneer hy ouer is en jy daar skoonmaak moet jy asseblief ook onthou om dit weer terug te rol tot in die oorspronklike posisie om enige moontlike komplikasies te voorkom.
Die belangrikste van die seuntjie se voorvel is om hom reeds van kleins af te leer om sy penis en onder sy voorvel skoon te hou.

Semen

DP skryf:

"Ek het die probleem nou al vir 2.5 jaar, Ek het bloed in my semen, Ek is nou 41 jaar oud . Ek het dit 2.5 jaar gelede ontdek toe ek en my vrou kondome gebruik het na my dogtertjie se geboorte. Ek was nou al by drie uroloë en hulle kon my nie help nie, ek het kanker toetse onder gaan vir die prostaat en ‘n piëlogram en proktoskopie maar die uroloog kan nie sê wat presies die probleem is nie. Die eerste uroloog wil my prostaat verwyder, toe sê ek hy moet warm plek toe gaan, Ek het nou al n vasektomie laat die November laas jaar en ook al die toets maar daar was nie n antwoord nie. Weet jy dalk van soortgelyke probleme en of daar enige medikasie is wat voor gestel kan word, Die laaste uroloog reken dit is n aartjie wat in die prostaat bars wanneer ek kom. Ek hoop jy kan help."

Dokter C:

Die goeie nuus is dat, terwyl mens jou boeglam skrik, dit selde baie ernstig is. Die laaste uroloog is waarskynlik reg. In meeste gevalle is dit 'n aartjie wat beskadig is in die prostaat of urienbuis. In meeste gevalle los die probleem homself op. Langer as twee jaar klink egter bietjie lank.

Soos jy self agterkom is die probleem dat dit besonder moeilik is om die bron van bloeding op te spoor. Daar word gewoonlik gekyk na moontlike oorsake. Dit sluit in:

• prostaatkanker - jy weet gelukkig jy is skoon
  
• 'n beskadigde aartjie in die prostaat of urienbuis - gewoonlik die geval
  
• 'n urienweginfeksie
  
• prostatitis (inflammasie van die prostaat)
  
• 'n seksueel oordraagbare siekte
  
• vergroting van die prostaat
• skade tydens 'n operasie - jy het mos geen operasie daar gehad voor dit begin het nie
• skade aan jou testikels of prostaat

Hoop bogenoemde was van hulp en dat julle die ding se gat sal skop.

Hoe nou met die pitsweer?

Anoniem skryf: "Dit is die tweede keer binne 4maande dat ek 'n groot, harde,baie pynlike sweer onder die vel op my linker sitvlak ontwikkel. Ek is 62, nie oorgewig nie,sweet slegs as ek oefen en is baie gesteld op persoonlike higiene.Dit laat my dink dat ek 'n lae weerstand het teen bakteriele infeksies. Aangesien ek 'n gesonde persoon is wat glo aan gesond eet en 'n gesonde lewenstyl beoefen, sal ek graag wil weet wat ek kan doen om hierdie toestand te verbeter.Die vorige sweer moes ek laat oopsny en dit lyk of ek dieselfde nou sal moet laat doen aangesien dit net groter en pynliker word. Help asseblief!"

Antwoord: Sover dit behandeling betref kan jy nie op hierdie stadium veel doen nie. 'n Pitsweer (indien dit 'n pitsweer is) wat reeds ontstaan het gaan sy gang gaan en medikasie gaan dit nie stuit nie.
Vra jou dokter vir 'n ondersoek om te probeer bepaal of daar iets ooglopend is wat die pitswere veroorsaak. 'n Kursus antibiotika kan ook help om enige skadelike bakterieë te vernietig.

Aggressiewe videospeletjies nie goed vir jou

Die eerste bewyse is gevind dat gewelddadige videospeletjies 'n negatiewe uitwerking op 'n persoon kan hê.

'n Studie deur navorsers by die Ohio State University in Amerika wat gepubliseer is in die Journal of Experimental Social Psychology wys op 'n toename in aggressie oor die langtermyn.

Volstruis-are vir jou hart

Japanese wetenskaplikes het volstruis-are gebruik om 'n suksesvolle hartomleiding op 'n vark uit te voer. Dit beteken dat 'n soortgelyke prosedure moontlik ook op mense gebruik kan word.

Die span het are in volstruise se nekke gebruik om kunsmatige are te vervaardig wat tot 30 cm lank kan wees en twee millimeters dik is.

Konvensionele plaasvervangers, soos die are van dooie mense, diere of sintetiese are, moet gewoonlik dubbel daardie lengte wees om gebruik te word. Die bloed vloei ook deur die are sonder die gebruik van klont-voorkomingsmiddels.

Bly gesond oor Kersfees

Hoe hou jy jou gesondheid in stand oor Kersfees met al die versoekings in die rondte? Hier is 'n paar dinge wat jy kan doen om jou deur die feesseisoen te help en die slegte spysvertering en hoofpyne te verminder.

• Sê nee vir suiker! 'n "Nee dankie" een of twee keer wanneer die koekbord verby kom sal wondere verrig vir jou middellyf se mate.
• Probeer om nie te veel af te wyk van wat jy normaalweg eet nie. Moet nie oorweldig word deur al die lekkernye nie. Probeer hou by wat jy altyd eet en drink. Soek tussen die lekkernye vir iets wat jy altyd sou eet daardie tyd van die dag.
• In plaas van aartappelskyfies en sjokolade kan jy aan vrugte en neute peusel. Wanneer jy lus raak vir sjokolade kan jy 'n goeie kwaliteit donker sjokolade geniet, dit bevat minder suiker en is ryk aan yster.
• Indien jy baie alkohol gebruik moet jy probeer om 'n glas water vir elke glas alkohol te drink. Neem ook elke dag 'n ekstra 2 000 mg vitamiene C.
• Oefen! Vakansie is 'n ideale tyd om te begin oefen. Gaan stap op die strand of verken jou buurt saam met die honde tydens sonopkoms.
• Maak seker dat jy elke dag jou dosis groente en vrugte kry! Dit hou jou gesond en maak jou minder lus vir die versoekings.

Slegte spysvertering

Letitia Strydom skryf:

"Ek sukkel al vir 'n paar jaar met pyne in die bors. Dit begin met 'n branderige gevoel en dit pyn so erg dat ek in twee kan vou, partykeer is dit kort en dan verdwyn dit en kom terug, ander kere is dit 'n lang tydperk van pyn. Dit help partykeer as ek op my rug gaan lê en diep asem haal. Wat kan dit wees en hoe kan ek dit beter kry? Dit gebeur meer gereeld die afgelope kere en is erger as ek 'n groot maaltyd gehad het."

Antwoord:

Ek sou voorstel jy gaan sien dadelik 'n dokter ingeval dit al meer as twee weke so aanhou. Omdat dit na groot maaltye voorkom kan dit slegte spysvertering (dispepsie) wees en mens moet maar die dokter gaan spreek indien dit meer as twee weke aanhou. Jy weet ook nie of dit weens 'n ander mediese toestand soos 'n breuk ofmaagseer, gastritis of esofagitis is nie.

Slegte spysvertering kom voor wanneer jy oorhaastig eet, ryk en vetterige kos eet, oorgewig is, aan stres ly of swanger is.

Van die algemene simptome is ongemak of krampe in die boonste deel van die maag en 'n drukkende brandgevoel in die bors.

Probeer jou maaltye kleiner hou. Rook, alkohol en koffie moet vermy word en mense met hoë stresvlakke moet daaraan aandag gee. Indien jy oorgewig is moet jy so gou as moontlik oefening kry en oorweeg om jou leefstyl te verander. Vermy vetterige kos!