Toep identifiseer geelsug by baba’s

Geelsug kom algemeen voor by pasgebore baba’s. ’n Geel velletjie is ’n aanduiding hiervan, maar dit is nie altyd maklik om te sien nie.

Ingenieurs en dokters aan die University of Washington het nou ’n slimfoon toepassing ontwikkel wat geelsug in baba’s opspoor. Die uitslag bied ’n goeie aanduiding of ’n baba ’n bloedtoets vir geelsug moet ondergaan.

Geelsug is ’n gevolg van die galkleurstof in die bloed, ’n byproduk van die afbreek van rooibloedselle. Die lewer verwerk hierdie stof, maar baba’s se lewer funksioneer gewoonlik nog nie goed genoeg daarom effektief te doen nie. As dit nie behandel word nie, kan ernstige geelsug breinskade veroorsaak.

Die toepassing word genoem Bilicam en dit gebruik die slimfoon se flits en ’n gekalibreerde kleurkaart om geelsug te identifiseer. Die kaart word op die baba se maag geplaas en ’n foto word geneem met die kaart ook in die prentjie. Die uitslag word dadelik na die foon gestuur.

Dagga help dalk teen Alzheimer’s

’n Groep neurowetenskaplikes aan die University of South Florida in Amerika het bevind dat ’n chemiese bestanddeel van dagga, die bekende THC-komponent, dalk help om die ontwikkeling van Alzheimer’s te vertraag.

Die bevindings is gepubliseer in die Journal of Alzheimer's Disease; "The Potential Therapeutic Effects of THC on Alzheimer's Disease".

Noodhulp: Buikdrukking vir bewustelose persone wat verstik het

1. Draai die persoon op sy / haar rug met die kop in die ooplugweg-posisie. Kniel wydsbeen oor die persoon se dye sodat u genoeg druk op die korrekte middelbuikposisie kan uitoefen. As jy nie oor die persoon kan kniel nie, kniel langsaan.
2. Plaas die onderkant van jou palm in die middel van die persoon se bobuik en bedek dit met jou ander hand. Hou jou vingers sovêr moontlik weg van die buik.
3. Hou jou arms reguit en druk op die buik met ’n vinnige opwaartse en voorwaartse drukking; vier maal indien nodig. Die druk moet hard genoeg wees om die versperring los te kry.

Alkoholiste dalk meer vatbaar vir griepvirus

’n Studie op muise het bewys dat alkoholiste dalk meer vatbaar is vir die griepvirus as ander mense.

Gereelde alkoholgebruik beskadig selle wat ’n teenreaksie moet loods as die liggaam die griepvirus identifiseer. Die gevolge kan so erg wees dat ’n algemene infeksie lewensgevaarlik kan raak. Dit word al sedert die 19de eeu algemeen aanvaar dat swaar alkoholgebruik ’n mens meer vatbaar maak vir longinfeksies.

Dit wil voorkom asof alkoholiste baie meer vatbaar is vir beide bakteriële en virale infeksies.

Noodhulp: Buikdrukking

’n Reeks drukkings op die boonste deel van die buik in ’n poging om lug uit die longe te forseer tydens verstikking. Gebruik slegs buikdrukking indien houe op die rug nie werk nie, want dit kan ander organe beskadig.

1. Neem plaas agter die persoon en plaas een arm om die buik. Maak ’n vuis en plaas dit, met die duim na binne, in die middel van die bobuik, tussen die naeltjie en die borsbeen.
2. Vat die vuis met die ander hand vas.
3. Trek nou albei hande vinnig na jou toe met ’n vinnige opwaartse en inwaartse drukking, sodat die bobuik teen die onderkant van die longe saamdruk. Herhaal tot vier maal indien nodig; elke drukking moet hard genoeg wees om die versperring los te kry.

Fetale blootstelling aan alkohol verbind aan gewigsprobleme

’n Nuwe studie het bevind dat kinders met fetale alkoholsindroom of gedeeltelike fetale alkoholsindroom geneig is om oorgewig te wees tydens adolessensie; sommige selfs ernstig vetsugtig.

Dit is nog nie duidelik of die probleem biologies van aard is en of dit ’n gedragsprobleem is nie; of selfs ’n kombinasie van die twee.

Aspiriene mag dalk help met bloedklonte

Aspiriene is dalk ’n goeie alternatiewe behandeling om te oorweeg om herhalende bloedklonte te voorkom.

Twee studies wat oor die tydperk van twee jaar onderneem is, het bevind dat die gebruik van aspiriene die kanse op herhalende bloedklonte met tot 42% verminder.

Dit is goeie nuus vir persone wat sukkel met diep binneaarse trombose, waar bloedklonte in are wat diep in die bene lê ontstaan, opbreek en in die longe beland waar dit are verstop.

Indien jy al ’n bloedklont gehad het, is jou kanse tot 10% om weer ’n klont in dieselfde jaar te ontwikkel. Daarna vermeerder jou kanse met sowat 5% per jaar.

Pasiënte word sterk aanbeveel om die gebruik van aspiriene eers met hul dokter te bespreek.

Die bevindings van die studies is gepubliseer in die joernaal Circulation.