Noodhulp, maak die lugweg oop

Iemand wat bewusteloos is se lugweg kan om verskeie redes toe wees. Dit kan tot die persoon se dood lei. Dit is dus baie belangrik dat jy onmiddellik vasstel of die persoon se lugweg oop is.

Om die lugweg oop te maak:

• Plaas een hand onder die persoon se nek en die ander op die voorkop.
• Kantel die kop agteroor.
• Dit sal die nek strek en behoort die lugweg oop te maak.
• Verskuif die hand op die nek nou na die bokant van die nek, onder die ken.
• Druk die ken na bo. (sien foto)
• Die beweging lig die kaak en laat die tong uit die lugweg beweeg.
• Nou kyk jy vir enige vreemde stof in die keel; los tande, braaksel, ens.
• Om dit te verwyder moet jy die persoon se kop na die kant toe draai.
• Hou jou wys- en middelvinger gebuig en druk dit in die persoon se mond.
• Beweeg jou vingers van kant tot kant in die mond.

Wanneer die lugweg oop is, kan die persoon spontaan begin asemhaal. Indien dit gebeur, plaas hulle in die herstelposisie. Indien die persoon nie asemhaal nie, moet jy met resussitasie begin.