Kanker van die galblaas

Die galblaas is 'n peervormige sak waarin galvloeistof tydelik gestoor word. Die vloeistof word deur die lewer geproduseer. Wanneer vetterige voedsel die maag verlaat, trek die galblaas saam. So word galvloeistof via die galbuise na die dunderm oorgedra. In die dunderm help dit om vette te verteer.

Kanker van die galblaas is ’n seldsame vorm van kanker. Hierdie tipe kanker is die algemeenste by vroue ouer as 60 jaar. Daar is min bekend oor galblaaskanker en omdat daar min pasiënte is, is daar nie soveel navorsing beskikbaar oor die oorsake, risikofaktore en moontlike behandelings nie. Dit word egter geassosieer met vetsug.