Bekkenfrakture

’n Bekkenfraktuur word gewoonlik veroorsaak deur vergruising of onregstreekse geweld, soos byvoorbeeld tydens ’n motorongeluk. Beserings aan die bekken kan gekompliseer word deur beserings van die blaas en urienkanale.

Simptome en tekens
• Pyn en teerheid in die omgewing van die heupe en lies. Dit word vererger deur beweging.
• Die persoon kan nie loop of staan nie, terwyl die bene oënskynlik niks makeer nie.
• Indien die blaas of urienkanale beseer is, sal die persoon ’n groot behoefte hê om te urineer. Indien die persoon wel urineer sal dit bloederig wees.
• Die persoon kan ook simptome en tekens van skok toon.

Maak die persoon gemaklik en reël vervoer na ’n hospitaal. Laat die persoon lê met die bene reguit of effens geknak, wat ook al gemakliker is. Indien die knieë geknak word, plaas ’n opgerolde kombers onder hulle.

Raai die persoon af om te urineer. Urien kan in die weefsels ingaan.

Bedek die persoon met ’n kombers indien julle vir vervoer wag. Behandel vir skok.