Noodhulp: Sirkuleer die bloed; borskassamedrukking

Dit help nie jy gaan voort met asemhaling vir iemand indien hulle hart nie klop nie. Nadat jy vier keer asemgehaal het vir die persoon moet jy kyk of daar 'n hartklop is. Indien daar geen hartklop is nie moet jy help met borskassamedrukking.

Voor jy met borskassamedrukking begin let op die volgende: As die hart klop, al is dit baie flou, moet jy nie borskassamedrukking toepas nie. Dit is gevaarlik dan aangesien die hart se aksie maklik versteur word.

Deur die borskas saam te druk word die hart se sametrekking nageboots. Deur af te druk op die onderste derde van die borsbeen word die drukking in die borskas verhoog en die bloed word uit die hart gedruk na die slagare toe. Wanneer die druk verlig word vloei die bloed terug na die hart toe.

Borskassamedrukking moet altyd voorafgegaan en vergesel word van kunsmatige asemhaling.

Om effektief te wees moet die samedrukking op 'n stewige oppervlakte gedoen word. Sodra daar 'n pols is, moet die samedrukking gestaak word. Jy kan voortgaan met kunsmatige asemhaling.