Kruie vir kwale: Sweer

Tradisionele genesers gebruik gifbol om pyn en wonde te behandel. Die buitenste bedekking van die bol (die skubbe) word op swere en absesse aangewend.

Die plant is giftig vir beeste en skape en die Khoisan het die gif vir hul pyle gebruik. Dit word ook na verwys as seeroogblom omdat blootstelling aan die oop blomme in 'n beperkte ruimte tot seer oë en selfs tot hoofpyn kan lei. Die plant bevat kragtige psigoaktiewe verbindings wat hallusinasies en ernstige vergiftiging kan veroorsaak indien dit verkeerd gebruik word. Daarom is interne toediening vir pynverligting uiters gevaarlik en gee ons nie die besonderhede van die proses nie. Ons beveel aan dat ‘n tradisionele geneser geraadpleeg word.

♦♦♦

Wanneer jy in ’n doring trap en die punt breek in jou voet af kan jy ’n skyf aartappel op die plek vasmaak. Dit sal inflammasie en swering teenwerk en kan selfs die doring nader aan die oppervlak bring.

♦♦♦

Die blare van die varkblom kan gebruik word om sere en pitswere te behandel. Was die blare in warm water om dit te ontsmet en warm te maak en verbind die seerplek daarmee oornag. Herhaal soos nodig.

♦♦♦

Plaas 20 g vars, gekapte wildewingerd-blare in 1 koppie kookwater en laat trek vir 5 minute. Gebruik dit vir die behandeling van swere.

♦♦♦

Maak ’n badmengsel deur 40 g wildeals-blare te bedek met 2 liter kookwater. Laat dit staan vir 2 uur.
Gooi deur ’n sif en botteleer.
Voeg die mengsel by jou badwater om te help met swere. Jy kan die geaffekteerde plekke liggies daarmee afspons.

♦♦♦

Maak 3 knoffelhuisies fyn saam met ’n knippie sout. Sit op ’n lappie en sit op die sweer.

♦♦♦

Bak 1 middelmatige ui in die kole so heel. Haal die buitenste skille af en sit die binneste so warm moontlik op die sweer om dit oop te trek.


Medisinale gebruike van kruie

Kruiegids

Sweer

’n Sweer is ’n etterende wond. Dit is verkieslik dat ’n dokter dit behandel, want as daar infeksie ontstaan kan dit ernstige gevolge inhou.

Boereraat:

Hou die sweer ’n rukkie in sterk soutwater. Smeer dan vaseline aan. Hou aan met die behandeling tot die sweer gesonder begin lyk.

♦♦♦

Maak 'n pap van semels. Sit nou 'n mespunt koeksoda by. Smeer dik op die lap en maak dan in die middel 'n holte. Gooi die holte vol brandewyn. Sit so warm as moontlik op die sweer. Sodra dit afgekoel het, dan vervang jy dit met 'n nuwe pleister. Die brandewyn moet altyd in die holte gegooi word. en nie in die pleister ingeroer word nie anders verdamp dit net.

♦♦♦

Klits 2 eiergele en 1 eetlepel heuning en 'n bietjie meel saam tot 'n pasta. Smeer op 'n skoon linnelap en sit op die seerplek. Dit sal die sweer ooptrek.

♦♦♦

Gooi 2 eetlepels Engelse sout in 750 ml kookwater. Gooi dit dan in n houer waarin jy die wond kan doop. Hou die seerplek daarin - so warm as wat jy dit kan verdra. Hou dit ook lank in die water. Jy moet aanhou tot die swelsel sak en die sweer plooierig word.
Maak nou 'n linnelappie nat in rou lynolie of kasterolie en plaas dit op die wond. Verbind dit met 'n warm lap en laat net so vir 6 uur.
Herhaal die proses indien nodig.

♦♦♦

Doop ’n ou linnelap in brandewyn en wring die vloeistof uit. Sit die lap op die sweer en hou aan natmaak in die brandewyn tot die sweer ryp is.


Medisinale gebruike van kruie

Kruiegids