Soek op hierdie werf

Gebruik die alfabetiese gids om te soek vir mediese inligting of tradisionele boererate.

A B C D E F G H I J K L M N O P Q R S T U V W Z Medisinale gebruike van kruie Kruiegids



Showing posts with label Servikskanker. Show all posts
Showing posts with label Servikskanker. Show all posts

17.3.14

Menslike Papiloom-virus (MPV)

MPV is ’n virusinfeksie wat servikskanker kan veroorsaak. Meisies kan egter ingeënt word teen die virus voor hulle seksueel aktief raak.

Feite oor servikskanker in Suid-Afrika:
  • Servikskanker is die tweede algemeenste kanker wat by vroue in Suid-Afrika voorkom.
  • MPV is 100% verantwoordelik vir servikskanker – die kwaadaardigste tipes MPV is 16 en 18, en dit is verantwoordelik vir 70% van alle serkvikskankergevalle.
  • Die entstof Ceravix® word teen MPV gebruik. Dit moet twee keer toegedien word met ’n interval van ses maande tussen dosisse.
  • Die entstof is die doeltreffendste wanneer dit op negejarige ouderdom toegedien word.
  • Daar is byna geen of net baie ligte newe-effekte.
  • Die entstof se veiligheid is telkemale bevestig. Vier sterftes is in die navorsingsfase aangemeld. Drie van hierdie sterftes was in die groep wat die placebo-entstof (namaaksel) ontvang het, en die sterftes kon dus nie aan die entstof toegeskryf word nie. Die vierde sterfte het niks te doen gehad met entstofgebruik nie.
  • Die virus word versprei deur vel-op-vel-kontak gedurende seks. Enige vrou wat seksueel verkeer, selfs al het sy net een seksmaat in haar hele lewe, kan MPV opdoen. Dus moet mans en pa’s hul vroue aanmoedig om hul servikale sifting (Papsmeer wat MPV en kanker kan ontdek) te laat doen en hulle moet verseker dat hul dogters teen MPV ingeënt word.
  • Daar is tans geen middels wat MPV kan behandel nie, slegs middels wat dit kan help voorkom.
  • Daar is 52 tipes MPV waarvan sowat 15 gewasvormend is (dit veroorsaak kanker). Twee van hierdie 15 tipes – MPV-tipes 16 en 18 – word in 70% van alle servikskanker gevind.
  • MPV veroorsaak dat kankeragtige selle op die boonste lae (wat die silinderepiteel genoem word) van die serviks ontwikkel. As dit ongemerk gelaat word, sal die selle in kanker ontaard wat na die baarmoeder sal versprei en na enige ander area van die liggaam kan versprei.
  • Wanneer ’n gesonde vrou met MPV besmet word, kan kanker tussen 10 tot 20 neem om te ontwikkel. Dit is hoekom ons vroue aanmoedig om elke vyf jaar vandat hulle 30 jaar oud is ’n servikale sifting (Papsmeer) te hê.
  • ’n Servikale sifting is ontwerp om pre- en kankeragtige selle te diagnoseer sodat behandeling met die pasiënt bespreek kan word.
Onthou, die entstof beskerm net teen die twee algemeenste tipes MPV, tipe 16 en 18, wat verantwoordelik is vir 70% van servikskanker. Daar is ander minder algemene tipes MPV wat servikskanker kan veroorsaak. En onthou dat die entstof nie teen ander seksueel oordraagbare siektes soos MIV, gonorree, sifilis, chlamydia en ander skadelike infeksies verwant aan seksuele aktiwiteit beskerm nie. Dit is dus belangrik om kondome te gebruik en veilige seks te beoefen.

24.2.14

Gratis inenting teen servikale kanker

Meisies in graad 4 wat 9 jaar of ouer is en in 'n openbare skool in Suid-Afrika is sal vanjaar gratis ingeënt kan word teen die menslike papilloom-virus (MPV). 80% van servikale kanker word veroorsaak deur die virus wat seksueel oordraagbaar is.

Laerskole sal besoek word vir die immunisering. Die meisies moet twee keer ingeënt word vir die inenting om effektief te wees. Die eerste inentings is van 10 Maart to 11 April 2014, en die tweede van 29 September to 31 Oktober 2014.

Soos met enige inenting kan die boarm rooi en seer word. Die entstof maak egter nie die kind siek nie.

Hierdie veldtog om negejarige skoolgaande dogters in te ent, sal elke jaar vir die volgende drie jaar plaasvind. Die verspreidingsprogram sal daarna herevalueer word.

Die entstof Ceravic is ook by dokters en apteke beskikbaar, maar dan is dit nie gratis nie. Dit moet toegedien word voor meisies seksueel aktief raak.

9.8.10

Servikskanker

Servikskanker is die tweede grootste kanker, naas borskanker, wat gediagnoseer word by vroue jonger as 45. Wêreldwyd sterf daar elke jaar sowat 270 000 vroue aan servikskanker.

Servikskanker kom voor wanneer infeksie met gewasse by die ingang van die baarmoeder (menslike papilloomvirus) chronies raak en dan oorgaan tot kanker. Meeste seksueel aktiewe vroue sal waarskynlik in hul leeftyd ’n menslike papilloomvirus-infeksie opdoen. Sommige vorms van die virus kan genitale vratte veroorsaak, maar ander kan tot servikskanker lei.

Daar is ’n entstof genaamd Cervarix wat die infeksies wat servikskanker veroorsaak voorkom. Hierdie entstof sal die infeksies wat servikskanker in vroue veroorsaak, voorkom en wêreldwyd duisende lewens red. Die entstof is ’n groot deurbraak vir wetenskaplikes én vroue wêreldwyd. Tot 23% van kankersterftes in Suid-Afrika is weens servikskanker. Cervarix is duur en sal die regering miljoene kos as hy sou besluit om die entstof gratis aan alle vroue beskikbaar te stel.


Die foto is van die papilloomvirus.