’n Mens kry cholera wanneer jy water drink of vis, skulpvis of ander kos eet wat besmet is met die fekalieë van ’n cholera-pasiënt. Die siekte versprei vinnig in gebiede met swak sanitasie en onbehandelde fekale afvalprodukte, byvoorbeeld wanneer rou riool gestort word in riviere of in seewater. Cholera word nie direk van een persoon na 'n ander oorgedra nie.
Cholera-infeksie veroorsaak dikwels baie ligte simptome of hoegenaamd geen simptome nie, maar ongeveer een uit elke twintig pasiënte ontwikkel ’n ernstige infeksie wat gekenmerk word deur aanhoudende waterige diarree, braking, dors en krampe. Dit kan lei tot ontwatering en skok. Sonder behandeling kan die persoon binne ure sterf.
Cholera kan eenvoudig en doeltreffend behandel word met rehidrasie-mengsels. Hierdie mengsels bevat die regte hoeveelhede natrium, kalium, chloried, bikarbonaat en glukose. Dit word met water gemeng en gedrink. In ernstige gevalle word die rehidrasie-middels binne-aars toegedien. Antibiotika kan die lengte en erns van die siekte verminder, maar dit is nie voldoende om lewensbedreigende ontwatering te voorkom nie.
