Anafilakse

Anafilakse is ’n ernstige allergiese sensitiwiteit vir ’n stof. Wanneer ’n lyer met die stof in aanraking kom bring dit ernstige skok teweeg. Dan praat ons van anafilaktiese skok – in sekere gevalle kan dit tot die dood lei.

Stowwe wat oor die algemeen hierdie toestand teweegbring is: sekere antibiotika, veral penisillien; inseksteke, veral van bye en perdebye; voedselallergieë, veral seekos en neute; en medikasie. Wat medikasie betref moet lyers versigtig wees vir aspiriene, nie-sterïodale antiinflammatoriese medikasie, opiate wat ingespuit word en bloedprodukte, soos byvoorbeeld immunoglobien.

Simptome en tekens
• Nies
• Loopneus
• Swaar asemhaling
• Maagpyn
• Naarheid
• Braking
• Diarree
• ’n Metaalagtige smaak in die mond
• Branderige en jeukerige oë
• Afskeidings uit die oë
• Vinnige polsslag
• Versteurde hartritme
• Lae bloeddruk

Die stof moet so gou as moontlik van / uit die persoon verwyder word.

Medikasie wat van tyd tot tyd gebruik kan word om die toestand te help beheer sluit in kortikosteroïede en antihistamiene. Lyers dra ook gewoonlik adrenalieninspuitings by hulle.

(foto: Greg Friese)