Ontdek: Die menslike liggaam

Hierdie boek gee nuuskierige agies die kans om die wonders van die menslike liggaam te ontdek.

Dit bied ’n omvattende blik op liggaamsprosesse –– van die kleinste selletjies tot die stelsels wat mense aan die lewe hou! Kinders kan onder andere ontdek hoeveel bloed deur die hart gepomp word, hoeveel spiere gebruik word om te glimlag en hoe die neus en ore binne-in lyk.

Die inhoud sluit in die menslike liggaam, mites, toorkrag en die geneeskunde, studie en disseksie, mikroskopiese liggaam, kyk sonder om te sny, liggaam se raamwerk, binne-in been, gewrigte, spierkrag, spiere, senuweestelsel, brein, binne-in die brein, vel en voel, oë en sien, ore en hoor, ruik en proe, hormone, die hart, in omloop, bloed, asemhaling, binne-in die longe, eet, vertering, afvalverwydering, manlik en vroulik, nuwe lewe, groei en ontwikkeling, die toekoms, tydlyn, vind meer uit. Die foto's en detail in die boek sal enige kind se belangstelling prikkel!

Hondsdolheid (Rabies)

Hondsdolheid is ’n dodelike virussiekte wat in diere soos honde, jakkalse, meerkatte, hiënas, vlermuise asook die mens voorkom. Die virus word in speeksel uitgeskei en tas die senustelsel aan. Die virus word deur die byt of krap van ’n besmette dier na die mens oorgedra. Die speeksel kan ook die siekte oordra wanneer dit in aanraking kom met die oë, mond of neus. In 99% van gevalle word dit deur ’n hondebyt veroorsaak in Suid-Afrika. In die Amerikas is vlêrmuisbyte die mees algemene oorsaak van hondsdolheid by mense en minder as 5% is afkomstig van honde.

Die tydperk wat verloop vandat die infeksie plaasvind in mense totdat die eerste simptome verskyn duur tipies 1 tot 3 maande. Die aanvanklike tekens en simptome is dikwels aspesifiek soos bv. koors en hoofpyn. Soos dit vererger veroorsaak dit inflammasie van die brein. Tekens en simptome kan insluit gedeeltelike verlamming, angstigheid, slaaploosheid, verwarring, abnormale gedrag, hallusinasies en soms selfs ’n koma. Wanneer die pasiënt simptome begin vertoon, is die behandeling gewoonlik nie meer effektief nie en die kanse op die dood is 99%. Mense sterf gewoonlik 2 tot 10 dae nadat die eerste simptome verskyn het.

Behandeling na blootstelling kan die siekte verhoed, indien die behandeling binne 10 dae na infeksie toegedien word. Wanneer ’n vlermuis in die slaapkamer gevind word, word dit beskou as ’n rede om behandeling toe te pas omdat ’n mens nie weet of die dier jou dalk in die nag gebyt het nie. Was die wond so gou as moontlik met seep en water vir sowat vyf minute. Povidoonjodium of alkohol word aanbeveel om die virus verder te verswak.

Inentingsprogramme en dierebeheer het die risiko van hondsdolheid, afkomstig van honde, verlaag.

Hitte-uitputting

Hitte-uitputting word veroorsaak deur die verlies van sout en water uit die liggaam.

Simptome en tekens
• Persoon is moeg en rusteloos.
• Kan hoofpyn hê en duiselig en naar voel.
• Krampe in die bene en buik as gevolg van ’n sout tekort.
• ’n Bleek gesig en die vel voel koud en klam.
• Asemhaling is vinnig en vlak.
• Pols is vinnig en vlak.
• Temperatuur sal normaal wees, of dit sal daal.
• Enige skielike beweging kan die persoon laat flou word.

Behandeling
1. Laat die persoon op ’n koel plek lê.
2. Gee klein slukkies koue water.
3. Indien die persoon erg sweet, krampe of diarree het en/of vomeer, voeg ’n teelepel sout by elke 0,5 liter water.
4. Indien die persoon bewusteloos is, plaas in die herstelposisie.
5. Kry mediese hulp.

Bewyse dat gemmer effektief is vir die behandeling van braking by kinders

Meeste kinders sal in hul eerste drie lewensjare aan gastro ly. Braking kom voor by driekwart van dié kinders – wat ’n gevaar vir dehidrasie inhou. Terwyl die kinders gewoonlik suksesvol behandel word, beland ’n groot persentasie in die hospitaal.

Onlangse navorsing het bevind dat gemmer effektief gebruik kan word vir die behandeling van braking by kinders met akute gastro. Daar is bevind gemmer kan die duur en die erns van braking verminder.

Die navorsing was ’n gesamentlike poging van die European Laboratory for the Investigation of Food Induced Diseases en die Universiteit van Napels in Italië.

Waterpokkies

Waterpokkies is 'n aansteeklike velsiekte. Die lyer kry 'n uitslag van klein donkerrooi knoppies op die lyf. Dit begin gewoonlik op die bors, rug, en die gesig en versprei dan na die res van die liggaam.

Ander simptome kan koors, moegheid en hoofpyn insluit. Simptome duur gewoonlik vyf tot sewe dae. Die vroeë simptome by adolessente en volwassenes is naarheid, gebrek aan eetlus, spierpyne en hoofpyn. Dit word gevolg deur die kenmerkende uitslag of sere in die mond en koors. By kinders is die eerste teken 'n uitslag of kolle in die mond. Die uitslag begin gewoonlik as klein rooi kolle op die gesig, kopvel, torso, boonste arms en bene.

Boereraat:

'n Waterpokkie-uitslag kan met 'n oplossing van een druppel pepermentolie en een druppel kamille-olie in 'n liter water behandel word. Maak die uitslag met die mengsel nat met 'n skoon waslap.

♦♦♦

Smeer mielieblom aan vir die jeuk.


Medisinale gebruike van kruie

Kruiegids

Angs

Angs is ’n baie onaangename vae gevoel van afwagting, gepaard met liggaamlike sensasies, onrustigheid en rusteloosheid.

Die belangrikste kenmerk waarna sielkundiges sal kyk is onrealistiese of oormatige kommer rakende twee of meer lewensomstandighede, bv. kommer oor finansies sonder ’n grondige rede. Hiermee saamgaan gaan amper 20 simptome. Sielkundige klassifikasie vereis dat ’n sekere aantal van hierdie simptome teenwoordig sal wees.

Die simptome sluit in: bewing, rukking of ’n bewerige gevoel; spiere wat pyn; rusteloosheid; vinnige uitputting; hartkloppings; kortasem of ’n benoude gevoel; sweterigheid of koue klam hande; droëmond; duiseligheid of lighoofdigheid; naarheid; diarree of ander maagprobleme; warm of koue gloede; gereelde urinering; probleme om te sluk; jy is baie gevoelig; ’n oordrewe skrikrespons; konsentrasieprobleme of blanko denke; slaapprobleme; en geïrriteerdheid.

Ongeag hoe goed dit met hierdie persone gaan, hulle is altyd angstig en bekommerd.

Die uitwerking van oorverhitting

Gedurende oefening word hitte in die spiere verwek en deur die bloed na alle dele van die liggaam versprei. Dit veroorsaak dat die algemene liggaamstemperatuur styg. Die liggaam reageer op die volgende manier om van die hitte ontslae te raak:

• Die haarvate vergroot en meer bloed word na die oppervlak van die vel vervoer. Dit laat die hitte ontsnap. Dit is wat jou warm en rooi laat lyk.
• Die sweetkliere produseer meer sweet. Die sweet verdamp en koel die liggaam af in die proses.
• Asemhaling neem toe en die hitte ontsnap deur die longe.

Indien jy nie genoeg afkoel nie kan twee toestande ontstaan; hitte-uitputting of hittesteek.